गैर नेवाः मःतपाखें नेवाः भासं रचना पाठ
येँ (नेपालभाषा टाइम्स) – येँ महानगरपालिकां स्कुल स्कुलय् नेवाः भाय् ब्वंकेगु सुरु यायेधुंकाः बुलुहुं नेवाः भाय् न्ववाना हइपिं अप्वया वःगु दु । थुकिया दसु शनिवाः व आइतवाः निन्हुयंकं जूगु छगू ज्याझ्वलय् खनेदत ।
येँ महानगरपालिका २२ वडाया ग्वाहालिइ नवदृष्टि समाज नेपालया ग्वसालय् स्कुलया मःतय्त नेवाः भासं रचना पाठ यायेगु निंतिं जूगु धेंधेंबल्लाखय् नेवाः जक मखु गैर नेवाः मःतय्सं नं नेवाः भासं पाठ यानाः न्यंकल ।
वंगु शनिवाः व आइतवाः निन्हुयंकं नेपालभाषा रचना पाठ यायेगु धेंधेंबल्लाः ज्याझ्वः जूगु खः । नेवाः सांःकृतिक छेँ धर्मपथय् जूगु ज्याझ्वलय् येँ महानगरपालिका दुनेया पीगुलिं मल्याक स्कुलया सछि व स्वीन्याम्ह मःतय्सं नेवाः भासं रचना पाठ यानाः न्यंकादीगु खः ।
धेंधेंबल्लाखय् न्यागू व खुगू तगिंया मःतय्त ‘यःमरि’ बारे रचना पाठ याके बिउगु खःसा न्हय्गू व च्यागू तगिंया मःतय्त ‘येँयाः जात्रा’ बारे पाठ ब्वनाः न्यंके बिउगु खः । शनिवाः जूगु छनौट चरणय् ‘यःमरि’ बारे ख्वीछम्हेसिनं थम्हं च्वयाहःगु रचना ब्वनाः न्यंकूगु खःसा न्हय्प्यम्हेसिनं ‘येँयाः जात्रा’ बारे रचना न्यंकादीगु खः ।
शनिवाः जूगु छनौट चरणपाखें बांलाःपिं झिम्ह झिम्ह मःतय्त ल्ययाः आइतवाः फाइनल चरणया धेंधेंबल्लाः याकूगु खः । फाइनल चरणय् ग्वसाः खलकं बिउगु रचनाया मःतय्सं पाठ यानाः न्यंकादीगु खः ।
धेंधेंबल्लाखय् रत्नराज्य माविया रोशनी प्रबिन, सिद्धार्थ वनस्थलीया आरोहिका तिमिल्सिना, रत्नराज्यया हे प्रदीप्ती खड्का, जनजागृति ज्ञानरश्मीया करिना तामाङ, आरम्भ संःकार विद्यालयया सुप्रिया श्रेष्ठ, सिद्धार्थ वनस्थलीया मायंका भण्डारी, जन जागृति ज्ञानरश्मीया प्रजिता तामाङ, सर्वज्ञ शिव बाबा माविया आरिका श्रेष्ठ, विश्व निकेतन उमाविया सुप्रिता थापा व पद्मकन्या माविया इस्टिना भट्टराई तगिं ७ व ८ पाखे शीर्ष झिम्हय् लाःगु खः ।
अथेहे तगिं ५–६ पाखे आरम्भ संःकार विद्यालय सामना मानन्धर, मेरिडियन इन्टरनेशनल स्कूलया आरुषी महर्जन, शान्ति निकुञ्ज मा.वि. लुँजला श्रेष्ठ, विश्व निकेतन मा.वि. स्टेफेन पोखरेल, सर्वज्ञ शिव बाबा विद्यालय आराध्या थापा, अरुणिमा माध्यमिक विद्यालय युनिक कटवाल, जगत मन्दिर माध्यमिक विद्यालय सोफिया सिम्खडा, श्री सिद्धेश्वर मा.वि.या सोहेल अन्सारी, सिद्धि गणेश मा.वि. युनिका बि.क. व सर्वज्ञ शिव बाबा विद्यालय आरिफा खातुन शीर्ष झिम्ह दुने लाःगु खः ।
शीर्ष झिम्हय् लाःपिं मस्तय् दथुइ जूगु धेंधेंबल्लाखय् तगिं ५ व ६ पाखे विश्व निकेतन माविया स्टेफन पाखेरेल न्हाप, शान्ति निकुञ्ज माविया लुँजला श्रेष्ठ लिउ व सर्वज्ञ सिद्ध बाबा स्कुलया आराध्य थापा लियांलिउ लाःगु खः । अथेहे तगिं ७ व ८ पाखे रत्नराज्य माविया प्रदीप्ती खड्का न्हाप, विश्व निकेतन माविया सुप्रिता थापा लिउ व जनजागृति ज्ञानरश्मी माविया कविता तामाङ लियांलिउ लाःगु खः ।
न्हाप, लिउ, लियांलिउ लाःपिं लिसें शीर्ष झिम्हय् लाःपिंत दसिपौ लिसें नगद सिरपाः लःल्हाःगु खः । न्हाप, लिउ व लियांलिउ लाःपिंत छसिकथं खुद्वः, प्यद्वः व नीन्यासः तका दां सिरपाः लःल्हाःगु खःसा हःपाः लाःपिं सकसितं म्हतिं झिंन्यासः झिंन्यासः तका दां सिरपाः लःल्हाःगु खः ।
नवदृष्टि समाज नेपालया नायः मिरा महर्जनया सभापतित्वय् जूगु ज्याझ्वलय् मूपाहां नेपालभाषा एकेदेमिया चान्सलर मल्ल के सुन्दर, नांजाःम्ह गायक, संगीतकार रोजमान महर्जन व येँ महानगरपालिका २२ वडाया नायः चिनिकाजी महर्जन व दुजः अनिल हाडां सिरपाः, दसिपौ लःल्हानादीगु खः ।
ज्याझ्वलय् नवदृष्टि समाजया न्वकु विनिता तण्डुकारं ज्याझ्वलय् ब्वति कयादीपिंलिसें ग्वाहालि यानादीपिं सकसितं सुभाय् बियादीगु खः ।
LEAVE YOUR COMMENTS