भारत व भूटानया नेवाःतय्त येँय् हयाः तजिलजि तालिम

येँ -भारतया थीथी प्रदेशय् च्वंपिं नेवाःतय्त येँय् हयाः नेवाः संस्कार, संस्कृति, भाय् व रहनसहन स्यनेज्या जुइत्यंगु दु । संस्कृतिविद् गणेशराम लाछिं उकिया तयारी यानादीगु खः । भारतीय नेवाःतय् बारे विशेष कक्षा न्ह्याकेगु निंतिं थ्वहे वइगु जुन २० निसें भारतया डुबर्सय् छगू सहलह जुइत्यंगु खँ नं वय्कलं कनादिल । भारतया थीथी च्यागू प्रदेश व भूटानया नेवाः प्रतिनिधितय् दथुइ भारतय् सहलह जुइगु खँ नं वय्कलं कनादिल ।

भारतया मणिपुर, नागाल्यान्ड, मेघालय, मेजोरम, अरुणाञ्चल, आसाम, सिक्किम, पश्चिम बंगाल व भूटानया नेवाःतय्सं उगु सहलहय् ब्वति काइ । भारतय् नेवाःतय् म्हसीका तना वनाच्वंगुलिं उकियात हाकनं पुनरोत्थान यायेगु कथं थ्व सहलह जुइत्यंगु खः । सहलहय् भारत व भूटानपाखें छगू प्रदेशं प्यम्ह प्यम्ह नेवाःतय्त नेपालय् हयाः तालिम बीगु योजना बारे बिचाः ब्याकी ।

थ्वहे झ्वलय् भारतया अरुणाञ्चलया नेवाःतय्सं थःगु जिल्लाय् दुपिं नेवाःतय्त स्वापू तः वा धकाः विज्ञापन यानाच्वंगु दुसा अथे मेमेगु प्रदेशया नेवाः संगठनतय्सं नं नेवाःतय् तथ्यांक मुंकेगु ज्या न्ह्याकाच्वंगु जानकारी नं भाजु लाछिं बियादीगु दु ।

नेपालय् लछि तक तयाः उमित नयेत्वनेगुया व्यवस्था लिसें तालिम बीगु ग्वसाः दु । थन तालिम कायेधुंकाः उमिसं हे थःथःगु लागाय् वनाः तालिम बीगु ज्या याइ । उकिया जिम्मेवारी नं भारतय् च्वंगु नेवाः संगठनं कायेमाःगु खँ भाजु लाछिं कनादीगु दु । भारतया थीथी प्रदेशय् नेवाः पहिचान मदयाः अनया नेवाःतय्त समस्या जुइवं उपिं थःपिं हे थुकथं नेवाः भाय् स्यनेगु लिसें तजिलजि सयेकेत उत्साहित जुयाच्वंगु दु । थनिं स्वला न्ह्यः जक भारतया आसामय् नं लाछिया हे नेतृत्वय् नेवाः तजिलजि ब्वज्या यायेगु ज्या जूगु खः ।