निर्वाचन सुरक्षा : माःसा २० मिनेटं सेना थ्यनी
येँ (नेपालभाषा टाइम्स)÷ गृह मन्त्रालयं निर्वाचनयात लिच्वः लाइगु गुगुं नं कथंया गतविधि नियन्त्रण यायेत सरकार सक्षम दुगु दावी याःगु दु । म्हिगः मन्त्रालयय् ग्वसाः ग्वःगु पत्रकार सम्मेलनय् गृह सचिव विनोदप्रकाश सिंहं भयरहित रुपय् मतदान याकेत सरकार प्रतिबद्ध दुगु खँ धाःगु खः ।
वय्कलं सुरक्षाया ल्याखं गुगुं नं कथंया कमी जुइ मखु धासें माःगु सुरक्षा प्रबन्ध मिले यायेधुनागु जानकारी बियादीगु खः । पत्रकारतलिसे खँ ल्हायेगु झ्वलय् वय्कलं हवाइ व स्थल गस्ती जुइगु धासें गुगुं नं मतदान केन्द्रय् छुं जुयाः समस्या वल धाःसा २० मिनेट दुने सेना थ्यंके फइगु व्यवस्था यानागु जानकारी नं बियादीगु दु । वय्कलं हवाइ गस्तीया नितिं नेपाली सेनाया हेलिकप्टर लिसें निजी क्षेत्रया हेलिकप्टर तयारी अवस्थाय् दुगु खँ धयादीगु दु ।
गृह मन्त्रालयं निर्वाचन स्यंकेत स्वइगु सम्भावित पुचः व संगठन म्हसीके धुंकूगु व गुलिसित नियन्त्रणय् कायेधुनागु जानकारी नं बिउगु दु । पत्रकार सम्मेलनया झ्वलय् गृह सचिव सिंहं धयादिल, ‘हिंसात्मक गतिविधि व क्रियाकलाप याइपिं व्यक्ति, पुचः व संगठनयात कानुनी दायराय् हयेगु ज्या जुयाच्वंगु दु । गुगुं नं कथं मतदानयात लिच्वः लाकेगु, कर्मचारी, मतदाताया सुरक्षा, उम्मेदवार व मतदान सामग्रीया सुरक्षाय् खतरा जुइगु खँ सहयाये फइगु मखु, उकियात कडा रुपय् नियन्त्रण यायेगु जुइ ।’
उकथं हे वय्कलं छुं पुचः, दल थःपिनिगु लिस्टिङय् दुगु व सुक्ष्म निगरानी यानाच्वंगु खँ कनादीगु दु । लिसें वय्कलं निर्वाचनयात लिच्वः लाकी कथंया गतिविधि नियन्त्रण यायेत सरकार सक्षम जूगु धासें उकिया नितिं माःगु निर्देशन स्थानीय तहलय् छ्वयेधुनागु जानकारी नं बियादीगु दु ।
थ्वहे झ्वलय् म्हिगः निर्वाचन आयोगया प्रमुख निर्वाचन आयुक्त व आयुक्तपिं लिसे प्रधानसेनापति प्रभुराम शर्मासहितया पुचलं नापलाःगु दु । वइगु मंसिर ४ गते जुइगु निर्वाचनया सुरक्षा व्यवस्थापनया सन्दर्भय् प्रधानसेनापति व आयोगया प्रतिनिधि दथुइ नापलायेगु ज्या जूगु खः ।
नापलायेगु झ्वलय् प्रधानसेनापति शर्मां निर्वाचन सुरक्षाया नितिं सेनां याना वयाच्वंगु ज्या कारबाही बारे आयोगया पदाधिकारीपिंत जानकारी याकुसें स्थलगत निरीक्षण व वयाच्वंगु सुचं कथं निर्वाचन सुरक्षाय् सेनाया पाखें म्हितेमाःगु भूमिका निर्वाह यायेत तयारी दुगु खँ धयादीगु खः ।
LEAVE YOUR COMMENTS