प्यला लिपा नेपाःया भूउपग्रह

येँ – आः वइगु प्यला लिपा अन्तरिक्षय् नेपाःया थःगु हे भूउपग्रह ब्वइगु जूगु दु । तसकं शक्तिशाली क्यामेरा व रिमोट प्रविधि जडान याना तःगु उगु भूउपग्रह अमेरिबकाया छगू कम्पनीं ब्वयेका बीगु खः । तर उकिया नियन्त्रण धाःसा नेपाःया भूमिं जुइ । येँय् च्वंगु नेपाल विज्ञान तथा प्रविधि प्रतिष्ठानया ज्याकूपाखें उगु भूउपग्रहया सञ्चालन जुइ ।

थ्व उपग्रह केवल १.३ किलो जक दुगु चिग्वःगु आकारया जुइ । उकिया लागिं नेपालं १ करोड ८० लाख तका खर्च याःगु दु । आः वइगु अप्रिलं थ्व सर्गतय् प्रक्षेपण जुइ । अन थ्यंगुयां लछि लिपा थ्वंज्या यायेगु शुरु याइ । थ्व भूउपग्रह सञ्चालन यायेगु लागिं नेपालं निम्ह वैज्ञानिकतय्त जापानय् तालिम कायेके छ्वःगु खः ।

थ्व भूउपग्रहपाखें नेपालं मौसम, सञ्चारया ख्यलय् यक्वं सुविधा काये फइ । थुकिया ग्वाहालि कयाः नेपालं खुसिबाः, वन विनास, पर्यावरण आदि ख्यलय् थःगु हे स्रोतं आधिकारिक सूचना काये फइ । मौसम पूर्वानुमानया लागिं मेपिंके निर्भर जुइ माली मखु ।
अमेरिकाय् थ्व भूउपग्रहया डिजायन थीथी न्हय्गू देशया वैज्ञानिकतय्सं याःगु खः । उकी नेपाःया निम्ह वैज्ञानिकत आभास मास्के व हरिराम श्रेष्ठ नं दुथ्याः ।

नेपाःया वैज्ञानिकतय्सं मेपिनि तुलनाय् थ्व छगू चीधंगु जक उपग्रह खःसां थनं लिपा धाःसा नेपाःया अन्तरिक्ष यात्रा शुरु जुइगु खँ धाःगु दु । थ्व उपग्रह वनेधुंकाः नेपालं भविष्यय् मेगु तग्वःगु व शक्तिशाली भूउपग्रहत प्रक्षेपण याये फइगु दावी नं उमिसं याःगु दु ।