मेयर्स फोरम बैठक उपत्यका विकास प्राधिकरण खारेजया माग

येँ – स्वनिगःया स्थानीय तहं संघीय सरकारं विद्यालय शिक्षाय् हस्तक्षेप याःगु द्वपं बिउगु दु । स्वनिगः दुनेया झिंच्यागुलिं नगरपालिकाया प्रमुख व उपप्रमुखं संघीय सरकारं आधारभूत व माध्यमिक तहतकया शिक्षा अधिकार स्थानीय तहयात बियातःगु जूसां नं उकी हस्तक्षेप याःगु द्वपं बिउगु खः ।

उपत्यका नगरपालिका फोरमया प्यक्वःगु विस्तारित बैठकं स्थानीय सरकारया अधिकार क्वपालेगु ल्याखं गठन याःगु ‘शिक्षा विकास व समन्वय इकाइ’ खारेज यायेत तकं माग याःगु दु । मध्यपुर थिमि नगरपालिकाया प्रमुख मदनसुन्दर श्रेष्ठं नेपाःया संविधान व स्थानीय सरकार संचालन ऐन–२०७४ निगुलिइ नं विद्यालय तहया पूर्ण अधिकार स्थानीय तहयात बियातःगु धयादिल ।

विद्यालय स्थापना, अनुमति, संचालन, व्यवस्थापन व नियमन यायेगु अधिकारतकं स्थानीय तहया क्षेत्राधिकार दुने लाः धासें प्रमुख श्रेष्ठं शिक्षा विकास व समन्वय इकाइपाखें संघीय सरकार कानून अःखः सक्रिय जूगु द्वपं बियादिल । वय्कलं इकाइया खारेजीलिसें इकाइपाखें जुइगु दक्वं ज्यायात पूर्ण रुपं अस्वीकार यायेगु बैठकं निर्णय याःगु जानकारी वय्कलं बियादिल ।

यल महानगरपालिकाया प्रमुख चिरिबाबु महर्जनं लछि लछि फोरमया बैठक च्वनाः दक्वं नगरपालिकाया दक्वं मंकाः विषयय् सहलह ब्याकेगु व निर्णय याना वयाच्वंगु जानकारी बियादिल । चाँगुनारायण नगरपालिकाया प्रमुख सोम मिश्रं स्वनिगःया नगरपालिकाया नेपाल सरकारं ‘डम्पिंग साइट’ दयेकेत स्वयाच्वंगु द्वपं बियादिसें मेथाय् गनं ज्या मवःपिं कर्मचारीयात स्वनिगःया स्थानीय तहय् छ्वया हःगु धयादिल ।

बैठकं काठमाडौं उपत्यका विकास प्राधिकरण खारेज यायते नं माग याःगु दु । प्राधिकणं स्थानीय सरकारया ज्या, कर्तव्य व अधिकारय् तःक्वः हस्तक्षेप याःगाु धासें उकियात खारेज यायेत नेपाल सरकार समक्ष माग याःगु खः ।