स्वयम्भूया द्यःमां मंत, द्वलंद्वः भक्तजनपिं सनाः

येँ – वय्कः न सुं तःधंम्ह नेता, न सुं तःधंम्ह कलाकार वा साहित्यकार । तर वय्कः मदुगु दुःखय् म्हिगः सनाः वःपिनि भीड खंबलय् लँय् वःपिं तकं सकलें अजूचाः । स्वयम्भू च्वय् हारती मांया नापसं च्वनादीम्ह नांजाःम्ह द्यःमां मय्जु तेजमाया बुद्धचार्य म्हीग मंत । म्हिगः वय्कःया सिथं यंकेगु ज्या जूगु खः ।

वय्कःया सिथं यंकेगु ज्याय् द्वलंद्वः हे मनूतय्सं ब्वति काःगु खः । वय्कःया सीम्ह लिसें सनाः वनेत येँ, यल, ख्वप जक मखु पोखरा, धरान, धनकुटांनिसें मनूत थ्यंकः वःगु खः । खास यानाः वय्कलं थःगु सिद्धिया बलं उपकार याना तःपिं मनूत म्हिगः अन थ्यंकः वःगु खः ।
स्वयम्भूया द्यःमां धाल कि स्वनिगः दुने तसकं नांजाः ।

वय्कःयात सम्मान याइपिं भक्तजनत नं यक्व हे दु । वय्कःया भक्तजनतय्सं वय्कःया नामं छगू पुचः समेत गठन यानाः तयातःगु दु ।
वय्कः मदयेवं वय्कःयात द्यः थें हे फ्यतुकाः आसनय् तःगु खः । लिसें सिथं हे उकथं हे यंकूगु खः । सिथं यंकाच्वंपिं आपालं मनूत शोक विह्वल जुयाः ख्वयाच्वंगु खः ।

मदुम्ह द्यःमांया जहान लिसें छम्ह काय व छम्ह म्ह्याय् दी । वय्कःया जहान भाजु दिलमान बुद्धाचार्य स्वयम्भूया गुर्जुपिं मध्ये थकालिम्ह खः । थकालिम्ह गुर्जु जूगुलिं वय्कः दुःखं च्वनेम्वाःगु चलन दुगु खँ धाःगु दु । थौं द्यःमां मदुगुया बिचाः हायेकः वनेगु ज्याझ्वः दुगु खँ सीदुगु दु ।