नेरेसोयात नर्वे रेडक्रसयात ग्वाहालि

येँ – विपद्या इलय् मानवीय ग्वाहालिया निंतिं क्रियाशील नेपाल रेडक्रस सोसाइटी (नेरेसो)यात नर्वेली रेडक्रसं बिया वयाच्वंगु ग्वाहालियात निरन्तरता बीगु जूगु दु ।नर्वेली रेडक्रसं वंगु ३३ दँ न्ह्यवंनिसें नेरेसयात मानवीय सेवाय् ग्वाहालि याना वयाच्वंगु खःसा विपद् व्यवस्थापन व मानवीय सेवाया थीथी क्षेत्रय् निरन्तर रुपं ग्वाहालि यानाच्वनेगु प्रतिवद्धता नर्वेली रेडक्रसं प्वंकूगु दु ।

निगू देय्या रेडक्रस सोसाइटी दथुइ थ्व सम्बन्धय् छगू सम्झौता नं जूगु दु । सम्झौता पती नेरेसोया केन्द्रीय अध्यक्ष संजीव थापा व नर्वेली रेडक्रसया उपाध्यक्ष मोर्टेल स्टोल्डेलं ल्हाःचिं तयादीगु खः । नेपाःया भ्रमणय् वयाच्वंम्ह नर्वेली रेडक्रसया उपाध्यक्ष स्टोल्डेलं नर्वेली रेडक्रसया विपद् व्यवस्थापन व मानवीय ग्वाहालिया झ्वलय् आर्थिक व प्राविधिक ग्वाहालि चूलाका वयाच्वंगु दु ।

स्टोल्डेलया नेतृत्वया प्रतिनिधिमण्डलं तःभुखाय् लिपा पुनःनिर्माण स्थलगत जानकारी नं काःगु खः ।उगु इलय् नेरेसोया अध्यक्ष थापा, महामन्त्री देवरत्न धाख्वा, उपमहामन्त्री हरि न्यौपानेपिंसं रेडक्रसया थीथी पक्ष व भूमिकायात कयाः चर्चा यानादीगु खः ।