सत्यमोहन जोशीया लुमन्ति मुँज्या

येँ(नेपालभाषा टाइम्स)- शताब्दी पुरुष डा. सत्यमोहन जोशीया गुण स्मरण यासें बसन्तपुली शनिवाः तःजिक लुमन्ति मुँज्या जुल । नेवाः देय् दबू नापं थीथी छगू दर्जन स्वयां अप्वः संघ संस्थाया ग्वसालय् जूगु गुण स्मरण ज्याझ्वलय् बिराट नेपालभाषा साहित्य सम्मेलन गुथिया सल्लाहकार डा. योगेन्द्र प्रधानं सांस्कृतिक दर्शनया प्रवर्तक सत्यमोहन जोशीं नेपाः देय्यात सांस्कृतिक धरोहर कथं म्हसीकेत आपालं योगदान यानादीगु कनादिसें आः सांस्कृतिक साम्राज्यवादया कारणं देय् पतनया स्थितिइ थ्यनेफु धयादिल ।

नेपालभाषा एकेडेमीया सदस्य सचिव डा. पुष्पराज राजकर्णिकारं छगू भाषा नीतिया बिरोधय् सतकय् हे वयाः संघर्षया लँ क्यनादीम्ह सत्यमोहनयात झीसं पहिचानया चेत दुम्ह ब्यक्ति कथं नं म्हसीकेमाःगु खँ कनादिल ।

नेवाः देय् दबूया नायः पवित्र बज्राचार्यया सभापतित्वय् जूगु लुमन्ति मुँज्याय् नेवाः न्ह्यलुवाः मल्ल के. सुन्दरं प्रजातान्त्रिक आन्दोलन व साहित्य भाषा सांस्कृतिक आन्दोलनय् सत्यमोहन जोशीं यानादीगु थीथी पक्षयात कयाः कुलादिल ।

छेँजःपिनिपाखें डा. पूर्णराज जोशीं थः अबुया बारे समाजय् न्यनाच्वंगु थीथी भ्रमयात स्पष्ट यानादीगु ज्याझ्वलय् प्रा. प्रेमशान्ति तुलाधरं लोक साहित्य परिषदय् च्वनाः स्वीन्यादँ न्ह्यःनिसें यानाच्वंगु थीथी योगदान बारे कुलादिल । जनकवि दुर्गालाल श्रेष्ठं सत्यमोहन जोशीयात लुमंकाः च्वयादीगु खय् भाय्या कविता न्यंकादीगु खः । छगू मिनेट मौन धारण यानाः उगु ज्याझ्वः जूगु खः ।