माधव नेपालयात कारवाही यानाः ओली फुटबल स्वः वन

येँ – अन्ततः प्रधानमन्त्रीलिसें नेकपा (एमाले) अध्यक्ष केपी शर्मा ओलीं पार्टीया पुलांम्ह महासचिव लिसें पुलांम्ह प्रधानमन्त्री माधव नेपालयात खुलाया लागिं पार्टीया साधारण सदस्यतां समेत निलम्बन याना बिउगु दु ।

नेपालया नापनापं पार्टीया उपाध्यक्ष भीम रावलयात नं खुला तकया लागिं पार्टीया सम्पूर्ण जिम्मेवारी लिसें साधारण सदस्यतां समेत निलम्बन याना बिउगु दु ।

थ्व स्वयां न्ह्यः नेपाल व रावल निम्हेसितं पार्टीं स्पष्टीकरण न्यंगु खःसा वय्कःपिं निम्हेस्यां नं स्पष्टीकरण बीगु पलेसा पार्टी अध्यक्षयात हे अःखः न्ह्यसः तयेगु व थःपिनि गुट कायम हे याना तयेगु कथंया लिसः बिउगुलिं पार्टीं निष्काशन यायेमाःगु खँ वय्कःयात बिउगु निलम्बनया पत्रय् धयातःगु दु ।

पार्टीपाखें मेपिं केन्द्रीय दुजःपिं घनश्याम भुसाल व सुरेन्द्र पाण्डेयात नं स्पष्टीकरण न्यंगु खः । तर वय्कःपिंसं आः तक उकिया लिसः मबिउगुनिगु कारणं उमित हानं स्पष्टीकरण न्यनेगु निर्णय नं याःगु दु ।
आः निलम्बन जूम्ह नेता माधव नेपाल एमालेया वरिष्ठतम नेता मध्ये छम्ह खः । पार्टीया तत्कालीन महासचिव मदन भण्डारी रहस्यमय गाडी दुर्घटनाय् लानाः मदयेवं न्हूम्ह महासचिवया रुपय् माधव नेपालं हे पार्टी न्ह्याकेगु ज्या यानादीगु खः । नेपालयात वर्तमान अध्यक्ष केपी ओलीं १५ दँ तक थम्हं नं नेता हे माने यानाः वयाच्वंगु खः । कारवाहीलय् लाःम्ह भीम रावल पार्टीया गुक्वःगु महाधिवेशनय् ओली नापं तुं उपाध्यक्ष पदय् निर्वाचित जुयादीम्ह खः ।

वय्कःपिंत बिउगु निलम्बनया पत्रय् यदि आत्मालोचना यानाः दुहां वल धाःसा वय्कःपिंत यानातःगु खुलाया निलम्बन दथुइ हे फुकुवा याये फइगु खँ नं धयातःगु दु । पार्टीपाखें आः मेपिं नं नेतातय्त कारवाही याये फइगु खँ सूत्रं धाःगु दु ।

प्रधानमन्त्री लिसें पार्टी अध्यक्ष केपी शर्मा ओली थः नेता माधव नेपाल व भीम रावलयात निलम्बन यायेगु पत्रय् हस्ताक्षर यानाःलि अनं तप्यंक दशरथ रंगशाला वनाः नेपाल व बंगलादेश दथुइ जूगु फुटबल स्वः झाःगु खः ।

सम्बन्धित बुखँ

LEAVE YOUR COMMENTS