ओमबहालय् सिद्धिचरण बुन्हि

येँ (नेपालभाषा टाइम्स)- नेपालभाषा व खस नेपाली भाय्या युगकवि सिद्धिचरण श्रेष्ठया ११२ क्वःगु बुन्हि म्हिगः न्यायेकल । युगकवि सिद्धिचरण स्मृति गुठीया ग्वसालय् थनया ओमबहालय् च्वंगु सिद्धिचरण चोकय् वय्कःया झ्वाताय् स्वां देछासें बुन्हि हंगु खः ।

संस्कृति, पर्यटन तथा नागरिक उड्डयनमन्त्री सुदन किराती मूपाहां कथं झाःगु उगु ज्याझ्वलय् प्रतिष्ठानया नायः वैरागी काइँला, प्रज्ञा–प्रतिष्ठानया कुलपति भुपाल राई, येँ क्षेत्र नं. ८ या सङ्घीय सांसद विराजभक्त श्रेष्ठ, प्रदेश सांसद शैलेन्द्र वज्राचार्य लिसें आपालं साहित्यकारपिनि उपस्थित दुगु खः ।

गुठीया नायः सुवर्ण शाक्यया अध्यक्षताय् जूगु उगु ज्याझ्वलय् न्ववासें मन्त्री किरातीं नेपाली राजनीतिइ हिउपाः हयेगु ज्याय् वय्कलं यानादीगु योगदानया कदर याये अझ नं मगाःनिगु खँ कनादिल ।

युगकवि श्रेष्ठया बुन्हि म्हिगःनिसें स्वन्हुयंकं सिरपाः इने, गोष्ठी आदि यासें हनाच्वंगु दु ।