गंकी वसुन्धरा व धुस्वां साय्मि सिर्जना पुरस्कार लःल्हात

येँ(नेपालभाषा टाइम्स)- गंकी धुस्वां वसुन्धरा प्रतिष्ठानया ग्वसालय् जूगु छगू ज्याझ्वःया दथुइ गंकी धुंस्वां वसुन्धरा पुरस्कार व धुंस्वां साय्मि सिर्जना पुरस्कार लःल्हाःगु दु । वंगु आइतवाः थनया प्रज्ञा प्रतिष्ठानय् जूगु ज्याझ्वलय् उगु पुरस्कार लःल्हाःगु खः ।

गंकी धुंस्वां वसुन्धरा पुरस्कार थुगुसी खस नेपाली भाय्या उपन्यासकार निलम कार्की निहारिकाया ‘द्रौपदी अवशेष’ उपन्यासया निंतिं उगु पुरस्कार लःल्हाःगु खः । अथे हे धुंस्वां साय्मि सिर्जना पुरस्कार वरिष्ठ ललितकलाकर्मी गोविन्दलाल सिं डंगोलयात लःल्हाःगु खः ।
प्रतिष्ठानया अध्यक्ष वरिष्ठ मुटुल्वय् विशेषज्ञ डा. अरुण साय्मिया सभापतित्वय् वय्कलं हे लसकुस यासें न्ह्याःगु ज्याझ्वलय् मूपाहांकथं नेपाल प्रज्ञा प्रतिष्ठानया कुलपति गंगाप्रसाद उपे्रती झायादीगु खः ।

मूपाहां कुलपति उपे्रतीं पुरस्कृतद्वययात दोसल्लां न्ययेकाः सम्मानपत्र लःल्हानादीगु खःसा प्रतिष्ठानया अध्यक्ष डा. साय्मिं स्वांमाः क्वखायेकादीगु खः । प्रतिष्ठानया संरक्षक डा. प्रकाश साय्मिं पुरस्कृतद्वययात नगद लःल्हानादीगु खः । निगुलिं पुरस्कार न्यय्द्वः तका दांया खः ।

ज्याझ्वलय् नवासें उपन्याकार कार्कीं थम्हं च्वयागु उपन्यास कर्णालीया परिवेशयात कयाः च्वयागु जानकारी बियादिल । गथे महाभारतय् द्रौपदी पाण्डवया कलाः जुइगु खःसा अथे हे कर्णालीइ नं छम्ह हे मिसायात दाजुकिजा सकसिनं कलाः नालीगु प्रचलनया बारे थःगु उपन्यासय् आख्यानया रुपय् न्ह्यब्वयागु खँ कनादिल ।

मेम्ह पुरस्कृत व्यक्तित्व वरिष्ठ ललितकलाकर्मी डंगोलं राज्यपाखें गुकथं ललित कलार्मीतय्त उपेक्षित यायेगु यानाच्वंगु दु धइगु बारे थःगु नुगःखँ तयादिल । वय्कलं राज्यं उपेक्षित याःसां थम्हं ललितकलाया ख्यलय् बियागु योगदानयात प्रतिष्ठानं लुमंकाः पुरस्कृत याःगुलिं लसता प्वंकादिल ।

ज्याझ्वलय् मूपाहां उपे्रतीं साहित्य व कलाकारिताया ख्यलय् योगदान बिउपिंत सम्मान व पुरस्कृत यायेगु बांलाःगु ज्या खः धयादिल । प्रतिष्ठानया कार्यकारी दुजः वरिष्ठ नाट्कर्मी हरिहर शर्मां सुभाय् देछानादीगु खः ।

उपन्यासकार कार्की विशेष यानाः मिसा स्वतन्त्रता व मानवहितया पक्षय् थःगु च्वसा न्ह्याका वयाच्वनादीम्ह खःसा वय्कलं च्वयादीगु दक्व धइथें उपन्यासं पुरस्कार त्याकेत ताःलाःगु नं ज्याझ्वलय् जानकारी बिउगु दु । उपन्यासकार कार्कीया चर्चित ‘चीर हरण’ व ‘योगमाया’ उपन्यासं पद्मश्री व मदन पुरस्कार त्याकेत ताःलाःगु खः ।

ललितकलाकर्मी डंगोलं देय् दुने व देशं पिने यानाः छगू दर्जनं मल्याक एकल मंकाः कला प्रदर्शनी यानादीधुंकूगु दु ।