अष्ट सद्धर्मायतनय् स्वक्वःखुसी कथिन दान

यल(नेपालभाषा टाइम्स)- थनया प्रयाग पोखरीइ च्वंगु अष्ट सद्धर्मायतन विहारय् स्वक्वःखुसी कथिनोत्सव ज्याझ्वः जुल । श्रीलंकाय् ३५ दँ तक च्वनाः नेपाः लिहां बिज्याःम्ह श्रद्धेय भिक्षु सागर महास्थविरं वर्षावास पूवंका बिज्याःगु लसताय् विहारय् उगु कथिनोत्सव जूगु खः ।

धिमय् बाजंसहित चीवर परिक्रमा लिपा अखिल नेपाल भिक्षु महासंघया अध्यक्ष श्रद्धेय भिक्षु धम्मशोभन महास्थविरं पंचशीललिसें कथिन दानया महत्वयात कयाः धर्मदेशना बिया बिज्याःगु ज्याझ्वलय् भिक्षु सुमेध महास्थविरं बुद्ध पुजा न्ह्याका बिज्याःगु खः ।

भिक्षु पञ्ञासारपाखे पुण्यानुमोदन याना बिज्याःगु ज्याझ्वलय् कथिन दानया दातापिं अनागारिका श्रद्धेय सारवति व अनागारिका मासा नापं विजयगोविन्द महर्जन व वय्कःया छेँजःपिंसं भिक्षु महासंघयात कथिन चीवर दान यानादीगु खः ।

ज्याझ्वलय् पाहांकथं झायादीम्ह नेपाःया निंतिं श्रीलंकाया राजदूत हिमाली अरुणा तिलका, विहारया दाता दया खड्गीलिसें मेपिं आपालं उपासक उपासिकापिसं भिक्षु महासंघयात अष्ट परिष्कार दान यानादीगु खः ।

नेपालभाषा टाइम्स

च्वमिया मेमेगु

• थुकथं न्ह्यात बोडेया म्ये प्वाः खनीगु जात्रा
• बिस्काःया झ्वलय् थिमिइ ‘सुथसिया याः’ न्यायेकल
• छायादेवीया जग्गा पुखू प्रमाणित
• पाहाँचःह्रे क्वचाल
• ताेखाय् बिस्काःया निंतिं यःसिं थन