ने. सं. ११४४ ञलाथ्व दशमी -

नगदेश विहारय् आयु संस्कार परित्याग दिवस

थिमि – नगदेश बौद्ध समूहया ग्वसालय् वंगु सिल्लाथ्व पुन्हि (सीपुन्हि) कुन्हु भगवान बुद्धया १५६३ क्वःगु आयु संस्कार परित्याग दिवस हन । शान्ति महानायक, गौतम बुद्धं आयु संस्कार परित्याग याःगु दिंया लुमंकाः जूगु ज्याझ्वःया दथुइ न्हू दयेकूगु शान्ति स्तुपा–चैत्य)या नं अनावरण याःगु खः ।

मूपाहां अखिल नेपाल भिक्षु महासंघया महासचिव भिक्षु कोण्डन्य महास्थविरं अष्टशील व पंचशील बियाबिज्याःगु ज्याझ्वलय् तःजिक बुद्धपुजा नं याःगु खः । बुद्धपुजालिसें दिवसया हे झ्वलय् विहारया वरिष्ठ उपासिका आशामाया तकोया निर्वाण कामना यासें विहारया कःसिं स्थापना याःगु शान्ति स्तूपा (चैत्य)या अनावरण नं भिक्षु कोण्डन्यं यानाबिज्याःगु खः ।

ज्याझ्वलय् भिक्षु कोण्डन्यं बौद्ध जगतय् सीपुन्हि (माघपुन्हि)या महत्वयात कयाः धर्मोपदेश बियाबिज्याःगु खःसा चैत्य स्थापनाया निंतिं ग्वाहालि यानादीपिं मदुम्ह उपासिका तकोया भिंचा हरिराम बाडे व वय्कःया जहान नापं उपासक तुल्सीबहादुर तकोयात दोसल्लां न्ययेकाः हनेज्या नं यानाबिज्याःगु खः ।

पुण्यानुमोदन यानाः क्वचायेकूगु ज्याझ्वलय् उपस्थित सकसितं भोजन याकेधुंकाः शान्तिया प्रतिमूर्ति भगवान बुद्धया मूर्ति सांस्कृतिक बाजंलिसें नगदेशया परिक्रमा याःगु खः । थ्व हे झ्वलय् २५६३ क्वःगु आयु संस्कार परित्याग दिवसया हे लसताय् लाकाः नगदेश बौद्ध समूहया ग्वसालय् नुगःचु व चिनी ल्वय् सम्बन्धी छगू स्वास्थ्य शिविर जुल ।

गौतमबुद्ध अन्तर्राष्ट्रिय कार्डियाक (मुटु) अस्पताल, कोटेश्वरया चिकित्सकतय् ग्वाहालिं उगु शिविर जूगु खः । शिविरय् नगदेशया लिसें सिन्धुपाल्चोक, दैलेखया नापं यानाः सछि व स्वीम्हेसिया नुगःचु व चिनी ल्वय्या परीक्षण यायेगु ज्या जूगु खः । शिविरय् चिनी ल्वय्या ल्वगिपिंत निःशुल्क वासः नं इनेज्या जूगु खः ।

समूहया नायः दीपकराज साँपालया सभाध्यक्षताय् जूगु ज्याझ्वलय् समूहया सचिव कृष्णकुमार प्रजापतिं भगवान बुद्धं आयु संस्कार परित्याग यानादीगु घटनायात कयाः चर्चा यानादिसें थज्याःगु महत्वपूर्ण दिं कुन्हु नुगःचु थेंजयःगु संवेदनशील अंगया परीक्षण व उपचार यायेत ग्वाहालि यानादीपिं सकसितं सुभाय् देछानादिल ।