किपुली लाय्कू डिजाइनया वडा भवन दयेकीगु
किपू (नेपालभाषा टाइम्स)÷किपू नगरपालिकां लाय्कू लागाय् च्वंगु वडा भवन लाय्कूया डिजाइनय् दयेकीगु जूगु दु । म्हिगः नियमित पत्रकार सम्मेलनय् मेयर रमेश महर्जनं थ्व खँ धयादीगु खः ।
थ्वयां न्ह्यः वडा नं. १ भवन दुगु थासय् लाय्कू हे दयेकेत्यंगु खँ पिहां वयाच्वंगु खःसा मेयर महर्जनं अन लाय्कू हे दयेकेत्यंगु मखुसें लाय्कू डिजाइनय् वडा भवन दयेकेत्यनागु खँ धयादीगु खः ।
किपूया लाय्कू धयातःगु थासय् न्हापा तलेजु देगः दुगु जूगुलिं अन तलेजु देगः हे दयेकेमाः लाय्कू दयेके मजिउ धइगु खँ पिहां वयाच्वंगु हे झ्वलय् मेयर महर्जनं अन लाय्कू डिजाइनय् वडा भवन दयेकेत्यनागु खँ स्पष्ट यानादीगु खः ।
पत्रकार सम्मेलनय् आर्थिक दँ २०७८÷७९ या किपू नपाया बजेट बारे नं जानकारी बिउगु खः । किपू नपां चालु आर्थिक दँया निंतिं १ अर्ब ४९ करोड ६५ लाख ८९ हजारया बजेट दयेकूगु दु । थुकी सम्पदा, संस्कृति संरक्षण व प्रवद्र्धनया निंतिं ४ करोड ६० लाख विनियोजन याःगु दु । थुगु ध्यबा सांस्कृतिक बाजं, जात्रा पर्व, पुजा गुथि, संचालन व व्यवस्थापन यायेत, बहाबही, चुक ननि, देगः, फल्चा, आदि सम्पदास्थलत संरक्षण यायेत खर्च याइ । अथेहे आधारभूत तहलय् स्थानीय पाठ्यक्रम लागू यायेत १५ लाख, पाठ्यक्रमय् स्वयंसेवी शिक्षक परिचालन यायेत १५ लाख, कोर एरिया परम्परागत शैलीं छेँ दयेकेत अनुदान बीत ५० लाख दां नं विनियोजन याःगु दु ।
LEAVE YOUR COMMENTS