चुनाव घोषणा जुइवं संसद भंग जुइमाःगु माग

येँ – आम निर्वाचन घोषणा जुइवं हे प्रतिनिधिसभा व प्रदेशसभाया कार्यकाल फुइमाःगु माग यासें सर्वोच्च अदालतय् रिट लाःगु दु । अधिवक्ता मनिराम उपाध्याय सहित न्याम्हेस्यां संघीय सरकार, प्रतिनिधिसभा, सभामुख व न्हय्गुलिं प्रदेश सरकारयात विपक्षी दयेकाः उगु रिट तःगु खः ।

थ्व स्वयां न्ह्यः अधिवक्ता उपाध्याय लगायतया पुचलं थ्वहे तर्क सहित सर्वोच्च अदालतय् निवेदन बीगु कुतः याःगु खःसां कामु मुख्य रजिष्ट्रार नारायण पन्थीं दर्ता मयासें दरपीठ यानाबिउगु खः । कामु मुख्य रजिष्ट्रार पन्थीया उगु दरपीठ विरुद्ध अधिवक्तातय्सं तप्यंक इजलायय् हाथ्या बिउगु खः ।

उकियात कयाः सुनुवाइ यासें न्यायाधीश सुष्मलता माथेमाया इजलासं प्रतिनिधिसभा व प्रदेशसभाया कार्यकालसम्बन्धी विषय सर्वोच्च अदालतं सुनुवाइ यानाः इजलासं हे निरुपण यायेगु प्रकृतिया खने दुगुलिं पन्थीया आदेश बदर यानाबिउगु दु । माथेमाया इजलासं ‘संविधान व कानुनया व्याख्या यानाः प्रतिनिधिसभा व प्रदेशसभाया कार्यकाल अन्त्य बारे निर्णय यायेमाःगु खनेदुगुलिं’ धासें निवेदन दर्ता यायेत आदेश बिउगु खः । वयां लिपा निवेदन दर्ता यानाः सर्वोच्च अदालतं वइगु आइतवाः सुनुवाइया मितिं क्वःछिउगु दु ।

सरकारं निर्वाचन आयोगया परामर्श कासें वंगु साउन १९ गते कुन्हु आः वइगु मंसिर ४ गते संघ व प्रदेशया निर्वाचन घोषणा यायेधुंकूगु दु । निर्वाचन घोषणा लिपा प्रतिनिधिसभा व प्रदेशसभाया कार्यकाल स्वतः फुइगु संसदीय व्यवस्थाया मान्यता अःखः आः नं नियमित रुपं सभा सञ्चालन जुयाच्वंगु, निर्वाचन घोषणा लिपा हे प्रतिनिधिसभां महत्वपूर्ण विधेयक पारित याःगुलिं थज्याःगु अभ्यास बन्द यायेमाःगु माग रिट निवेदनय् यानातःगु दु ।