असंभुलु अजिमा मर्मत ज्याय् ग्वाहालि याःपिंत हना

येँ (नेपालभाषा टाइम्स)÷ असंया असंभुलु अजिमा देगःया मर्मत सम्भारय् ग्वाहालि याःपिंत हनेज्या याःगु दु । असन सेवा समितिया ग्वसालय् भाद्र ३ गते असंभुलु अजिमाद्यःयाथाय् क्षमा पुजा यासें जूगु छगू ज्याझ्वलय् देगः मर्मत सम्भारया निंतिं आर्थिक लिसें थीथी कथं ग्वाहालि यानादीपिंत हनेज्या याःगु खः ।

समितिया नायः अरुणलाल श्रेष्ठया सभापतित्वय् जूगु ज्याझ्वलय् मू पाहाँ पूर्वप्रधानन्यायाधीश कल्याण श्रेष्ठ, विशेष पाहाँ बागमती प्रदेशया सांसद् हरिप्रभा खड्गी श्रेष्ठ, पाहाँपिं २७ वडा अध्यक्ष योगेशकुमार खड्गी, होटल अन्नपूर्णया थुवाः श्रृजना राणापिंसं सम्मान लःल्हानादीगु खः ।

समितिया पुलांम्ह अध्यक्ष यज्ञरत्न तुलाधरं खादा क्वखायेकाः लसकुस याःगु ज्याझ्वलय् येँ महानगरपालिकाया पुलांम्ह मेयर विद्यासुन्दर शाक्य, पुलांपिं वडाध्यक्षपिं चिनियामान वज्राचार्य व विजयनारायण मानन्धर, प्रेमहिरा तुलाधर, प्रकाश साय्मि, मूर्ति कलाकार श्याम तुलाधरपिंत नं मूपाहाँ पाखें सम्मान याःगु खः ।

समितिया नायः श्रेष्ठं लसकुस यानाः न्ह्याःगु ज्याझ्वलय् प्रकाश साय्मिं अन्नपूर्ण द्यःया बारे जानकारी बियादीगु खःसा सहकोषाध्यक्ष पुरुषोत्तम रत्न तुलाधरं आम्दानी खर्चया ल्याःचाः न्ह्यब्वयादीगु खः ।
सहकोषाध्यक्ष तुलाधरं ल्याःचाः न्ह्यब्वयादिसें चन्दादातापिनि पाखें ५७ लाख ७४ हजार ९०८ तका दुहां वःगु व ४३ लाख ७७ हजार २४९ तका खर्च जूगु, सम्मान ज्याझ्वः व भ्वय् लिपा ल्यं दुगु ध्यबा कोषय् मुनाच्वंगु जानकारी बियादीगु खः ।

वि.सं. २०७४ मंसिर निसें न्ह्याःगु मर्मत सम्भारया झ्वलय् देगलय् च्वंगु लुं सियातःगु त्वरं सफा यानाः टल्के यायेगु, सिजःया अष्टमातृका व कवंछ्यनय् वहलं भुनाबीगु, द्यःया जवंखवं वहया अष्टमंगल तयेगु, पतालय् लुं सीगु, देगःया छचाखेर कलश तयेगु, देगः न्ह्यःने जवखवं कलश तयेगु लिसें रंगरोगन लगायतया ज्या जूगु खँ समितिया नायः श्रेष्ठं कनादिल ।

समितिया उपाध्यक्ष ललितकाजी तुलाधरं सुभाय् देछायादीगु, प्रेमहिरा तुलाधरं न्ह्याकादीगु ज्याझ्वः लिपा प्रसाद कथं भ्वय् नकेगु ज्या नं जूगु खः ।