बाथल्वय् चिकित्सक सम्मेलन जुइगु

येँ – नेपालय् न्हापांखुसी बाथल्वय्या चिकित्सकतय् सम्मेलन जुइगु जूगु दु । नेपाल बाथरोग संघया ग्वसालय् कन्हय् असोज १० व ११ गते निन्हुयंकं उगु सम्मेलन जुइत्यंगु खः । सममेलनय् दक्षिण एशियाली क्षेत्रया नेपाः लगायत भारत, पाकिस्तान, श्रीलंका, बंगलादेश, भुटानया न्यय्म्हं मल्याक विशेषज्ञया सहभागिता दइ ।

दक्षिण एशियाय् लिपांगु इलय् बाथल्वय्या अवस्था, लिपांगु उपचार प्रविधि, समस्या, ल्वय्या रोकथाम व ल्वय्यात बारे आम नागरिकया दथुइ जनचेतना अभिवृद्धि यायेगु ल्याखं जू वनाच्वंगु सम्मेलनय् नेपाःपाखें सछि व नीन्याम्ह स्वयां अप्वः चिकित्सक व स्वास्थ्यकर्मिया सहभागिता दइ ।

नेपालय् न्हापांखुसी जू वनाच्वंगु सम्मेलनय् थीथी देशं सहभागि जुयादीपिंसं थ्व ल्वय्या अवस्थायात कयाः ज्यापौ नं न्ह्यब्वइगु संघया कार्यसमितिया दुजःनापं बाथल्वय् विशेषज्ञ श्वेता नकःमिं जानकारी बियादिल । छगू तथ्यांककथं नेपाःया कुल जनसंख्यामध्ये करिब ३० प्रतिशत अर्थात स्वीगू लाख मनूयात गुगुं नं कथंया बाथल्वय्या समस्या दु ।

थुकीमध्ये १५ प्रतिशत जक उपचारया पहुँचय् थ्यनाच्वंगु व करिब ७० प्रतिशत स्वयां अप्वः ल्वगिं दथुइ हे वासः नयेगु त्वःता हयाच्वंगु संघया धापू दु । हिया परीक्षण यायेधुंकाः जक बाथ ल्वय्या बारे न्हापां जानकारी काये फइगु व थ्व सम्बन्धी ल्वय् सछि स्वयां अप्वः प्रकारया दुगु बाथल्वय् विशेष नकःमिं धयादी ।

युरिक एसिड, हाडजोर्नी, क्वँय् ज्यला वनीगु, दुगःक्वँचय् अप्वः समस्या जुइगु, सामान्य ज्वर वइगु, जोर्नी स्याइगु, मना वइगु, पुलि, चुल्या, नाडी स्याइगु, जोर्नी कक्रक्क जुइगु थेंज्याःगु समस्या नेपालय् अप्वः खने दयाच्वंगु बाथल्वय्या समस्या खः ।