निर्वाचन आयोगया ख्याच्वः

येँ (नेपालभाषा टाइम्स)÷प्रमुख निर्वाचन आयुक्त दिनेशकुमार थपलियां मंसिर ४ गते जुइगु प्रतिनिधिसभा व प्रदेशसभा निर्वाचन भयरहित व निष्पक्ष ढंगं क्वचायेकेगु खँ धयादीगु दु । वय्कलं गुगुं नं मतदान केन्द्रय् हाकनं मतदान यायेमाःगु अवस्था ब्वलंके मबी कथं निर्वाचन आयोगं तयारी यानाच्वंगु खँ नं कनादीगु दु ।

आयोग व नेपाल कानुन समाजं मंकाः कथं झापाय् म्हिगः ग्वसाः ग्वःगु ‘निर्वाचन आचार संहिताया प्रभावकारी कार्यान्वयन व सरोकारवालाया भूमिका’ विषयक ज्याझ्वलय् न्ववायेगु झ्वलय् प्रमुख आयुक्त थपलियां उगु खँ धयादीगु खः ।

वय्कलं तःधंगु प्राकृतिक विपत्ति बाहेक सुरक्षाया कारण वा राजनीतिक दलं गुगुं नं कथं मतदातायात प्रभाव लाकेगु कुतः यात धाःसा सम्बद्ध दल व व्यक्तियात कानुन कथं कारबाही यायेगु तर उगु हे कारणं हाकनं मतदान जुइके मबीगु आयोगं तयारी यानाच्वंगु खँ नं धयादीगु दु ।

मतदातायात लोभ, लालच, धाक धम्कीया कारणं मतदान यायेत मछिंगु अवस्था ब्वलंके मबी कथं आयोगं देय्न्यंकं सचेतनामूलक ज्याझ्वः यानाच्वंगु खँ नं वय्कलं धयादीगु दु ।

निर्वाचन आचार संहिता व निर्वाचनया खर्चया पालन लिसें स्वच्छ व स्वतन्त्र निर्वाचन याकेगु प्रक्रियाय् आयोग दुगु धासें सामाजिक सञ्जालपाखें प्रसारण जुइगु मिथ्या, सुचं, दुश्प्रचार, घृणास्पद अभिव्यक्ति पनेगु ज्याय् नं आयोग न्ह्यानाच्वंगु धासें प्रमुख आयुक्त थपलियां निर्वाचनया स्वच्छता लिसे लोकतन्त्र व अभिव्यक्ति स्वतन्त्रतायात फयां फछि अप्वः छ्यलाः निर्वाचन क्वचायेकेत आयोगं न्ह्यानाच्वंगु जानकारी नं वय्कलं बियादिल ।