राष्ट्रकवि माधव घिमिरे मंत

येँ (नेपालभाषा टाइम्स) – जुजु ज्ञानेन्द्रपाखें ‘राष्ट्रकवि’ उपाधिं विभूषित याना तःम्ह खस नेपाली भाषाया वरिष्ठ कवि माधव घिमिरे म्हिगः मंत । वय्कः १०१ दँ दुम्ह खः । भाजु घिमिरे खास हे उसाँय् मदयाच्वंम्ह मखुसां वय्कः वंगु छुं ई न्ह्यवंनिसें छेँनं धाःसा पिहां मझासे च्वनाच्वंम्ह खः ।

कवि माधव घिमिरेयात १०० दँ पूवंगु लसताय् येँय् विशेष रुपं सम्मान याःगु खः । खस नेपाली भाषाय् वय्कलं आपालं नांजाःगु कृति बियादीगु दु। साहित्यय् ज्वः मदुम्ह प्रतिभा खःसां भाजु घिमिरे राजनीतिक रुपं धाःसा नेपाःया शाहवंशीय राजपरिवारलिसे सतीगु कारणं इलय् व्यलय् विवादय् वयेगु याः । वय्कःयात जुजु ज्ञानेन्द्रं ‘राष्ट्रकवि’या उपाधि बीगुया नापं नेपाली सेनां मानार्थ रथीया दर्जा नं बियातःगु दु ।