कुलमानयात कारवाही यात धाःसा आन्दोलन यायेगु ख्याच्वः
येँ (नेपालभाषा टाइम्स)÷ तामाङ राष्ट्रिय मुक्ति मोर्चा नेपालं डेडिकेटेड व ट्रंक लाइन सुविधा कयाः प्रिमियर शुल्क मपूपिं उद्योगीया ल्यं दनिगु बक्यौता असुल यायेत कुतः जुयाच्वंगु इलय् नेपाल विद्युत प्राधिकरणया कार्यकारी निर्देशक कुलमान घिसिङयात पदमुक्त यायेगु वा गुगु नं कथंया कारवाहीया प्रक्रिया न्ह्याकल धाःसा आन्दोलनय् कुहां वयेगु ख्याच्वः बिउगु दु ।
मोर्चां डेडिकेटेड व ट्रंकलाइन सुविधा कयाः प्रिमियर शुल्क मपूपिं उद्योगीया ल्यं दनिगु बक्यौता असुल यायेगु सम्बन्धय् विकसित घटनाक्रम बारे थःगु संगठनया ध्यानाकर्षण जूगु धासें मोर्चाया केन्द्रीय अध्यक्ष डिल्लीमान तामाङ व महासचिव लिलाकुमार घलानं विज्ञप्ति जारी यासें ख्याच्वः बिउगु खः ।
कार्यकारी निर्देशक घिसिङं देय्यात लोडसेडिङया खिउँगु युगं मुक्त यानाः विद्युत निर्यातपाखें वैदेशिक मुद्रा आर्जन, विद्युत महुसल मपूगु उद्योगया थ्यंमथ्यं २२ अर्ब बक्यौता असुली यायेगु निंतिं धिसिलाक्क पलाः छिउगु धासें विज्ञप्तिइ धयातःगु दु, ‘कार्यकारी निर्देशक घिसिङया ऐतिहासिक योगदानयात अवमूल्यन यायेगु कथं गुगुं नं कथंया निर्णय मयायेत मोर्चा सरकारया ध्यानाकर्षण यानाच्वना ।’
LEAVE YOUR COMMENTS