नगदरहित बस यात्राया शुभारम्भ

किपू- सार्वजनिक यातायातय् यात्रा यायेबलय् खुद्रा ध्यबा मदयाः तसकं समस्या जुइयः । तर आः सार्वजनिक यातायातय् खुद्रा व नगद ज्वना वनेमाःगु बाध्यता मदइगु जूगु दु ।

किपुलिइ सार्वजनिक यातायातय् यात्रा यायेबलय् खुद्रा ध्यबा मदइगु झन्झटया अन्त्य जूगु दु । नेपालय् न्हापांखुसी किपुलिइ नगदरहित यात्राया शुरु जूगु दु । किपुलिइ संचालनय् दुगु किपू बस सेवा प्रा.लिं. थ्व सुविधा उपलब्ध याकूगु खः ।

किपू नगरपालिकाया प्रमुख रमेश महर्जनं हालय् जक थुगु सेवाया शुभारम्भ यानादीगु खः । प्रमुख महर्जनं आधुनिक प्रविधि प्रयोग यानाः दयेकूगु ‘मेट्रो कार्ड’या शुभारम्भ यानादिसें वय्कलं कार्डया प्रयोगपाखें भुक्तानी जुइगुलिं आः नगद ज्वना जुइमाःगु बाध्यताया अन्त्य जूगु खँ धयादीगु दु ।

किपू नगरपालिका हे संरक्षण जुयाच्वंगु कार्डया शुभारम्भ यानादिसें वय्कलं कम्पनीं संचालनय् हःगु कार्ड आधुनिक विश्वलिसें प्रतिस्पर्धा यायेगु ल्याखं किपुलिइ नं थुगु सेवा शुरु यानागु खः धयादिल ।

किपू नगरपालिका नं बुलुहुं प्रविधिमैत्री व डिजिटलाइज्ड जुया वनाच्वंगु धासें उगु कार्डपाखें किपू नगरपालिकालिसें मेमेगु नं आपालं थासय् प्रयोग याये फइगु विश्वास नं वय्कलं प्वंकादिल ।
कम्पनीं स्वंगूकथंया कार्ड प्रयोगय् हःगु खः ।