छात्रवृत्ति मबिउगु स्कुलतय् नां सार्वजनिक
येँ (नेपालभाषा टाइम्स)- येँ महानगरपालिकां छात्रवृत्ति वितरण विवरण बुझे मयाःगु निजी स्कुलया नां म्हिगः सार्वजनिक याःगु दु । येँ मनपा शिक्षा विभागं १० तगिं तकया विद्यार्थीयात जेठ १५ गते तक छात्रवृत्ति इनाः उकिया विवरण जेठ १६ गते दुने पेश यायेत सुचं पिथंगु खः । म्हिगः मनपां सार्वजनिक याःगु सुचनय् ३४२ गू निजी स्कुलं छात्रवृत्ति विवरण सार्वजनिक मयाःगु खँ न्ह्यथनातःगु दु ।
येँ मनपा दुने ५२० गू निजी स्कुल सञ्चालन जुयाच्वंगु दु । उगु स्कुलयात थ्वहे वइगु जेठ २८ गते दुने छात्रवृत्ति विवरण पेश यायेत हाकनं म्याद बिउगु दु । सुचं बियागु ई दुने नं विवरण पेश मयाइगु स्कुलया अनुमति÷स्वीकृति रद्द यायेगु वा कानुन कथं कारबाही यायेगु ख्याच्वः नं बियातःगु दु ।
शिक्षा नियमावली २०५९ व महागनर शिक्षा ऐन २०७५ व नियमावलीइ निजी स्कुलय् ब्वनाच्वंपिं विद्यार्थी मध्ये निश्चित प्रतिशत विद्यार्थीयात छात्रवृत्ति बीमाःगु व्यवस्था दु । ऐनय् दुगु व्यवस्था पालना मयात धाःसा स्कुलया स्वीकृति÷अनुमति तकं रद्द याये फइगु कानुनी प्रावधान दु ।
ऐनय् दुगु व्यवस्था कथं निजी स्कुलं मुक्कं भर्ना जूपिं विद्यार्थी ल्याःया १० प्रतिशत विद्यार्थीयात छात्रवृत्ति बीमाःगु व्यवस्था दु । उकिया नितिं सम्बन्धित वडाया वडाध्यक्ष, विद्यालय निरीक्षक, अभिभावकया प्रतिनिधिया समन्वयय् छात्रवृत्ति वितरण सम्बन्धी मापदण्ड क्वःछीमाः । तर निजी स्कुलतय्सं थः यत्थे विद्यार्थी ल्ययेगु यानाच्वंगु अभिभावकया गुनासो वयेवं येँ मनपां सुचं पिथंगु खः । येँ मनपां वंगु वैशाख २४ गते छात्रवृत्ति इनेत स्कुलयात पौ च्वःगु खः ।
थ्वहे झ्वलय् मेयर बालेन साहं छात्रवृत्ति बुझे याःगु विद्यालययात सुभाय् बीगु दु । सामाजिक सञ्जालय् च्वसें मेयर साहं येँ मनपा दुने ब्वति च्वंपिं विद्यार्थीं नियम कथं काये
दइगु अधिकारया बारेय् गम्भीर दुगु खँ धाःगु दु ।
LEAVE YOUR COMMENTS