राष्ट्रिय परिचय पत्र याकनं जारी यायेत प्रमया निर्देशन

येँ – प्रधानमन्त्री केपी ओलीं राष्ट्रिय परिचय पत्र फक्व याकनं जारी यायेत निर्देशन बियादीगु दु । प्रम ओलीं सकल नेपाःमिया एकीकृत व पूवंक विवरण दुगु राष्ट्रिय परिचयपत्र फक्व याकनं जारी यायेत धासें सम्बन्धित मन्त्रालययात निर्देशन बियादीगु खः । प्रम ओलीं दक्वं मन्त्रालयया मन्त्री व सचिवतय् बैठकय् राष्ट्रिय परिचयपत्र फक्व याकनं जारी यायेत धासें निर्देशन बियादीगु खः ।

उगु इलय् वय्कलं राष्ट्रिय परिचयपत्र जारी मजूगुलिं यानाः सरकारं यायेमाःगु सेवा प्रवाह प्रभावकारी जुइ मफयाच्वंगुलिं आः गुलि फु उलि याकनं राष्ट्रिय परिचयपत्र जारी यानाः अपराधरहित समाज निर्माण यायेगु ज्याय् लगे जुइत धासें गृह मन्त्रालयया निर्देशन बियादीगु प्रधानमन्त्रीया ज्याकुथिं जारी याःगु छगू विज्ञप्तीइ धयातःगु दु ।

न्हूगु आर्थिक दँया शुरुया दिंनिसें हे सरकारं हःगु बजेटया पूर्ण व प्रभावकारी कायान्वयनया निंतिं थीथी मन्त्री व सचिवतलिसें जूगु बैठकय् सम्बन्धित मन्त्रालयया मन्त्रीतय् योजना प्रस्तुतीकरण लिपा प्रम ओलीं उकथंया निर्देशन बियादीगु विज्ञप्तीइ धयातःगु दु ।