
दाहाल मन्त्रिपरिषद् पूर्ण जुइवं हे आलोचना व कचवं
येँ (नेपालभाषा टाइम्स)- प्रधानमन्त्री पुष्पकमल दाहालं म्हिगः मन्त्रिपरिषद विस्तार यानाः पूर्णता बियादिल । मन्त्रिपरिषद् विस्तार जुइवं उकी दुथ्याःपिं मन्त्रीतय्गु कडा आलोचना नं शुरु जूगु दु ।
नागरिकतासम्बन्धी विवादय् लाःम्ह मनूयात गृहमन्त्री दयेकल धकाः थ्व सरकारया अथें नं आलोचना जुयाच्वंगु खःसा ‘ए’ क्लासया निर्माण कम्पनी चायेकाः ठेकेदारी ज्या याइम्ह विक्रम पाण्डेयात शहरी विकास मन्त्री दयेकल धकाः नं आलोचना शुरु जूगु दु । पाण्डे विरुद्ध ठेकेदारी सम्बन्धी आपालं उजुरी व मुद्दा समेत लानाच्वंगु दु ।
उकथं हे म्यानपावर कम्पनी चले याइम्ह डोलप्रसाद अर्यालयात श्रम मन्त्री दयेकूगु खँय् कडा आलोचना जूगु दुसा शिक्षा सम्बन्धी एनजीओ चले याइम्ह शिशिर खनालयात शिक्षा मन्त्री दयेकूगु खँय् नं यक्वसिया चित्त बुझे जूगु खने मदु । वय्कःपिं निम्ह राष्ट्रिय स्वतन्त्र पार्टीया सांसद खः ।
परराष्ट्रमन्त्री जूम्ह राष्ट्रिय सभाया एमाले सांसद डा. विमला पौडेल राई राष्ट्रपति विद्या भण्डारीया कोटां वःगु चर्चा एमाले दुने जुयाच्वंगु दु ।
म्हिगःया मन्त्रिपरिषद विस्तारय् जनमत पार्टीया सांसद अब्दुल खान धाःसा अनुपस्थित जुयादिल । वय्कलं थःपिंत बिउगु मन्त्रालय चित्त बुझे मजू धासें मन्त्रिपरिषद विस्तार ज्याझ्वलय् मवंगु खः । जनमत पार्टीयात खानेपानी मन्त्रालयया जिम्मेवारी बिउगु खःसा सांसद खानं उकियात अस्वीकार यानादीगु खः ।
जनमत पार्टीं मन्त्रालय बाँडफाँडय् थःगु दलया असहमति दु धासें मन्त्रिपरिषद विस्तारय् ब्वति मकाःगु खः । लिसे पार्टी लिसे सहलह मयासे मन्त्रालय बाँडफाँड जूगु धासें उकी नं असन्तोष प्वंकूगु दु । जनमत पार्टीं उद्योग, वाणिज्य तथा आपूर्ति मन्त्रालय दाबी याना वयाच्वंगु खः । खानं दाहाल प्रधानमन्त्री नियुक्त जूकुन्हु
बिना विभागीय मन्त्रीया रुपय् शपथ काःगु खः ।
उकथं हे जनता समाजवादी पार्टी नं सरकारय् मवनीगु जूगु दु । प्रधामन्त्री दाहालं विश्वासया मत काःगु इलय् जसपां नं मत बिउगु खः । जसपां उपराष्ट्रपति माः धकाः माग याना वयाच्वंगु खःसा गठबन्धन दुने राष्ट्रपति व उपराष्ट्रपति, सभामुख व उपसभामुख गुगु पार्टीयात बीगु धइगु निर्णय मजूनि । जसपां थःपिंत उपराष्ट्रपति मदइगु खःसा सरकारय् मवनेगु रणनीति दयेकाच्वंगु खँ सीदुगु दु ।
मन्त्रिपरिषद् विस्तार याःसां नं प्रधानमन्त्रीं निगू मन्त्रालय धाःसा थःके हे तयातःगु दनि । प्रधानमन्त्री दाहालं वन तथा वातावरण व युवा तथा खेलकुद मन्त्रालय थःके हे तयातःगु खः ।
शहीद मखु, पशुपतिनाथ
मन्त्री पदया शपथ ग्रहण यायेवं न्हूपिं मन्त्रीतय्सं शहीदपिं प्रति श्रद्धांजलि प्वंकः वनेगु चलन दुसां म्हिगः मन्त्रीत शहीद गेट वंगु खने मंत । राप्रपाया मन्त्रीत धाःसा शपथ ग्रहण सिधयेवं पशुपति वनाः महाद्यःया दर्शन याः वंगु खः । राप्रपां हिन्दू राष्ट्रया माग याना वयाच्वंगु दु ।
LEAVE YOUR COMMENTS