बौद्ध सम्मेलन व स्वांयाःपुन्हिया प्रारम्भिक तयारी पूवन

येँ- लुम्बिनी विकास कोषं बुद्ध जन्मस्थल लुम्बिनीइ जुइगु स्वांयाःपुन्हिया मू ज्याझ्वः व अन्तर्राष्ट्रिय बौद्ध सम्मेलन तःजिक न्यायेकेगु निर्णय याःगु दु । बुद्ध जन्मस्थल लुम्बिनीइ वइगु बैशाख १५ व १६ गते अन्तर्राष्ट्रिय बौद्ध सम्मेलन व १७ गतेकुन्हु स्वांयाःपुन्हि तःजिक हनीगु जुयाच्वंगु दु ।

निन्हुयंकं जुइगु बौद्ध सम्मेलन व वयां कन्हय् कुन्हुया स्वांयाःपुन्हिया मूल समारोहया निंतिं तीव्र रुपं तयारी यानाच्वंगु कोषं निगुलिं ज्याझ्वःया प्रारम्भिक तयारी पूवने धुंकूगु जानकारी बिउगु दु । संस्कृति, पर्यटन व नागरिक उड्डयन मन्त्री रविन्द्र अधिकारीया अध्यक्षताय् छुं दिं न्ह्यः च्वंगु छगू बैठकं ज्याझ्वःयात ऐतिहासिक व भव्य रुपं न्यायेकेया निंतिं तयारी यायेत धासें थीथी उपसमितियात निर्देशन नं बिउगु दु ।

थ्व स्वयां न्ह्यः लुम्बिनीया च्वंगु बैठकं निगुलिं ज्याझ्वः सफल यायेत गठन याःगु उपसमितियात पूर्णता बिउगु खः । बैशाख १५ व १६ गते बुद्ध जन्मस्थल लुम्बिनीइ निन्हुयंकं जुइगु अन्तर्राष्ट्रिय बौद्ध सम्मेलनय् नीस्वंगू देशं ब्वति काइगु जुयाच्वंगु दु । आतकया दुने भारत, जापान, फ्रान्स, बेलायत, मलेशिया, पोल्याण्ड, जर्मनी, श्रीलंका लगायतया देशं ब्वति काइगु पक्का जुइ धुंकूगु दुसा सम्मेलनय् ब्वति काइगु राष्ट्रमध्ये झिंस्वंगू देय्या धार्मिक व संस्कृति मन्त्रीं ब्वति काइगु ज्याझ्वः दुगु कोषं न्ह्यथंगु दु ।

मेमेगु देय्पाखें बौद्ध संघसंस्थाया प्रतिनिधिं ब्वति काइगु सम्मेलनय् करिब खुसः बौद्ध प्रतिनिधिया सहभागिता दइगु कोषं जानकारी बिउगु दु । बैशाख १५ गते जुइगु अन्तर्राष्ट्रिय बौद्ध सम्मेलनया उलेज्या प्रधानमन्त्री केपी ओलीं यानादीगु व बैशाख १७ गते जुइगु स्वांयाःपुन्हिया मू ज्याझ्वलय् राष्ट्रपति विद्यादेवी भण्डारी मूपाहाकथं झायादीगु ज्याझ्वः दु ।

थनिं निदँ न्ह्यः स्वांयाःपुन्हिया मू ज्याझ्वः जुयाच्वंगु इलय् तच्वकं वाफय् नापं वा वयाः ज्याझ्वः हे बांलाक न्ह्याये मफयेवं उगु इलय् मूपाहां कथं झायादीम्ह प्रधानमन्त्री ओलीं दछिया दुने लुम्बिनीइ सभाहल निर्माण यायेत निर्देशन बियादीगु खः । प्रमया निर्देशन लिपा तत्काल सभाहल निर्माण प्रक्रिया शुरु जूसां परामर्शदाता ल्ययेगु, सुझाव कायेगु व बोलपत्र प्रक्रियाय् थ्व निदँया ई फुइ धुंकूगु दु ।

थ्व हे झ्वलय् स्वांयाःपुन्हिकुन्हु लःल्हायेगु याना वयाच्वंगु तर अवरुद्ध थें जुयाच्वंगु अन्तर्राष्टि शान्ति पुरस्कार थ्व हे थुगु हे दँीनसें हाकनं न्ह्याकेगु निर्णय जूगु कोषया निमित्त सदस्य सचिव सरोज भट्टराई नं कनादीगु दु ।

सम्बन्धित बुखँ

LEAVE YOUR COMMENTS