ख्वपय् संगीत प्रशिक्षण शुरु

ख्वप – ताम्राकार संगीत प्रशिक्षण केन्द्र २५ दँ क्यंगु रजत महोत्सव व मुक्ति संगीत प्रशिक्षण केन्द्र झिंन्यादँ क्यंगु लसताय् ख्वपय् स्वला तकया निःशुल्क संगीत प्रशिक्षण वंगु शनिवाः शुरु जुल । सिद्धि स्मृति प्रतिष्ठानय् जूगु संगीत प्रशिक्षणया उलेज्या नेपाल सांस्कृतिक संस्थानया महाप्रबन्धक राजेश थापां यानादीगु खः ।

प्रशिक्षणय् गायन, हार्मोनियम बादन, बासुरि, तबला बादन व हुलाप्याखंया प्रशिक्षण जुइगु जानकारी ग्वसाः खलकं बिउगु दु ।
मूपाहां महाप्रबन्धक थापां सांस्कृतिक संस्थानं याना वयाच्वनागु थीथी प्रशिक्षणया जानकारी बियादिल ।

वय्कलं ख्वपया संगीत ख्यलय् सक्रिय नृत्य निर्देशक सीताराम होरा, महेश्वरदास कार्जी, गायक व संगीतकार रोशनकुमार राजभण्डारी, कुमार ग्वाछा, कृष्णश्वरी वांङाय्यः, सत्यनारायण दिदिया, कान्छी साखः, सूर्यनारायण ताम्राकार, कपिल कछपाल, अनु कछपाल, रञ्जना सितिखु, अनिता श्रेष्ठ, रोशन धौबञ्जार, ओमप्रकाश श्रेष्ठ, सत्यनारायण प्रजापति, मनोज केसी व पत्रकार कृष्ण प्रजापतियात खादा क्वखायेका हनेज्या यानादिल ।

केन्द्रया महाप्रबन्धक बद्रीनारायण ताम्राकारया सभापतित्वय् जूगु ज्याझ्वलय् विशेष पाहां ५ वडाया वडाअध्यक्ष प्रेमगोपाल कर्माचार्य, प्रतिष्ठानया अध्यक्ष श्यामसुन्दर धौभडेल, वरिष्ठ सितार वादक सीतामैंया राजचल, नेपाल बैंक लिमिटेडया महाप्रवन्धक सन्तोष न्यौपाने, लायन्स क्लव अफ ख्वपया रोशन भ्वय्द्यःपिंसं नं भिंतुना देछानादीगु खः ।