ने. सं. ११४३ चौलाथ्व सप्तमी -

मेलम्चीइ हानं खुसिबाः वयाः आतंक

येँ – मदिक्क वा वयाच्वंगुलिं मलेम्ची खुसि हानं बाः वयेगु शुरु जूगु दु । थुकिं यानाः मेलम्चीया स्थानीय जनता चिन्तित जूगु दु । छुं न्हि न्ह्यः तिनि मेलम्ची खुसि बाः वयाः मेलम्ची बजाः हे चुइका यंकूगु खः । बजाः चुइका यंकूगुलिं आपालं मनूत छेँ मदयेकाः च्वनाच्वंगु दुसा चुइका मयंकूगु छेँय् नं सुं च्वं वने फयाच्वंगु मदुनि ।

बुधवाः न्हिनंनिसें मदिक्क वयाच्वंगु वां हानं खुसिइ अप्वः लः बाः वयेवं न्हापा थें खुसिबाः वइगु खः लाकि धकाः स्थानीयवासी चिन्तित जूगु दु । प्रहरीं नं अनया स्थानीय जनतायात खुसिबाः वःगु खँय् सतर्क जुइत इनाप याःगु दु । मौसम पूर्वानुमान महाशाखाया कथं तटीय क्षेत्रय् अझ नं खुसिबाः वयेफुगु जूगुलिं सुरक्षित थासय् वनाः च्वनेत इनाप याःगु खः ।

वंगु असार १ गते व ५ गतेया खुसिबालं बचे जूगु बुँ नं थौंकन्हय् खुसिं कटान यानाच्वंगु खँ धाःगु दु । आः हानं मदिक्क वा वःगुलिं उकुन्हुया खुसिबालं बचे जूगु छेँत नं चुइका यंकीगु खः लाकि धकाः चिउताः ब्वलनाच्वंगु दु ।

थौंकन्हय् मेलम्ची खुसि न्हापाया धाः त्वःताः न्हूगु धालं बाः वनाच्वंगु दु । थुकिं यानाः बचे जूगु छेँत नं आः चुइका यंकीगु खतरा ब्वलंगु दु । छेँ त्वःताः पिहां वयाच्वंपिं मनूतय्सं खुसिबाः धाः पुलांगु थासय् यंकेत सुझाव बियाच्वंसां अथे यायेगु सम्भावना धाःसा आः थथें मदयाच्वंगु खँ धाःगु दु ।

मेलम्ची खुसिबाः वयाः मेलम्ची बजारय् जक अर्बौं तकाया नोक्सान जूगु अनुमान याःगु दु । छेँ चुइका यंकूपिं मनूत थौंकन्हय् कर्पिनि छेँय् च्वनाच्वंगु दुसा खुसिं धाः हिउगु कारणं आपालं मनूतय् छेँ जक मखु जग्गा तकं गायब जूगु दु । खुसिबालं अनया लँ, ताँ, छेँ नापं आपालं संरचनात ध्वस्त जूगु दु । थ्व पुनर्निर्माण यायेगु लागिं यक्व हे ई व ध्यबा तुइगु अनुमान जुयाच्वंगु दु ।