न्हय्म्ह मन्त्रीतय् राजीनामा, बादल ओली पक्षय्

येँ – प्रधानमन्त्री ओलीं संसद विघटन यायेवं ओलीया मन्त्रिमण्डलय् दुथ्याःपिं न्हय्म्ह मन्त्रीतय्सं मंकाः कथं राजीनामा याःगु दु । म्हिगः हे सिंहदरबारय् छगू पत्रकार सम्मेलन यासें प्रचण्ड–ओली पक्षया मन्त्रीतय्सं राजीनामा याःगु खः ।

शिक्षा, विज्ञान तथा प्रविधि मन्त्री गिरिराजमणि पोखरेल, ऊर्जा, जलश्रोत तथा सिँचाइ मन्त्री वर्षमान पुन, कृषि तथा पशुपंक्षी विकास मन्त्री घनश्याम भुसाल, संस्कृति पर्यटन तथा उड्डयनमन्त्री योगेश भट्टराई, वन तथा वातावरण मन्त्री शक्ति बस्नेत, श्रम तथा रोजगार मन्त्री रामेश्वर राय यादव व खानेपानी तथा सरसफाइ मन्त्री बीना मगरं प्रधानमन्त्रीया पलाः राजनीतिक मूल्य मान्यताया अःखः जूगुलिं गम्भीर असहमति दु धासें राजीनामा बियादीगु खः ।

मेखे पुलांगु माओवादीपाखें वःपिं गृहमन्त्री रामबहादुर थापा व उद्योगमन्त्री लेखराज भट्टं राजीनामा मबिसे थःपिं ओलीया पक्षय् दुगु क्यंगु दु ।