स्थानीय चुनावया बं मपूसा आः ल्वाये मदु
येँ (नेपालभाषा टाइम्स)÷निर्वाचन आयोगं स्थानीय निर्वाचनया इलय् याःगु खर्चया विवरण बुझे मयाःपिं उम्मेदवारतय्सं यदि इलय् हे जरिवाना बुझे मयात धाःसा समानुपातिक उम्मेदवारया धलखं नां लिकायेगु खँ धाःगु दु ।
आयोगया कथं स्थानीय निर्वाचनय् उम्मेदवार जूपिं व कानुन कथं इलय् खर्च विवरण बुझे मयाःपिं ४३९ म्ह मनूया नां मंसिर ४ गते जुइगु निर्वाचनया समानुपातिक धलखय् लानाच्वंगु दु ।
आयोगं समानुपातिक धलखय् नां लानाच्वंपिं उम्मेदवारतय्त कार्तिक ५ गते तकया दुने बं पुलेत इनाप याःगु दु । बं पुल धाःसा कानून कथं ज्या न्ह्याकेगु व मपुल धाःसा प्रतिनिधिसभा तथा प्रदेशसभाया समानुपातिक धलखं नां चीका छ्वयेगु खँ आयोगं धाःगु दु ।
आयोगं स्थानीय चुनावय् खर्च विवरण बुझे मयाःपिं १ लाख २३ हजार ६२४ म्ह उम्मेदवारयात बं पुइकेगु निर्णय यानातःगु दु । स्थानीय चुनावय् उम्मेदवार जूपिं ८० प्रतिशत उम्मेदवारतय्सं आः तक निर्वाचन खर्चया विवरण बुझे याःगु मदुनि ।
LEAVE YOUR COMMENTS