जागरुकया न्याक्वःगु हिदान क्वचाल

येँ (नेपालभाषा टाइम्स) – जागरुक युवा समाजं हिदान ज्याझ्वःयात निरन्तरता बीगु झ्वलय् आइतबाः येँया वसन्तपुलिइ हिदान ज्याझ्वः याःगु दु ।

ब्लड डोनर्स एशोसिएन नेपाल (ब्लोदान) या आव्हानय् समाजं येँ महानगरपालिका २४ वडालिसेया मंकाः ग्वसालय् न्याक्वःगु खुसी हिदान ज्याझ्वः याःगु खः । कोभिड १९ महामारीया हुनिं हिया अभाव खनेदया वयाच्वंगुलिं समाजं वाःपतिकं हिदान ज्याझ्वः याना वयाच्वंगु दु। थुगु वालय् वसन्तपुरस्थित महाःद्यः पार्वती दबुलिइ ज्याझ्वः याःगु खः ।

समाजया ल्यू छ्यान्जे राजीव श्रेष्ठं संयोजन याःगु ज्याझ्वलय् मुक्कं २०म्हेसिनं हिदान याःगु खः । ज्याझ्वलय् केन्द्रिय रक्तसञ्चार केन्दया निर्देशक डा.मनिता राजकर्निकार, ब्लोदानया केन्द्रीय कोषाध्यक्ष मचाकाजी महर्जन, २४ वडाया वडासदस्य लिसें ब्लोदानया केन्द्रिय दुजः व समाजया सल्लाहकार बिनोद तुलाधर लिसेंया उपस्थिति दुगु खः ।