‘जिमित नं गणना या, समावेश या’

महिला, बालबालिका तथा नागरिक मन्त्री थपमाया थापां अपांगताबारे दयाच्वंगु ऐन कानुन प्रभावकारी कार्यान्वयनया निंतिं सम्बन्धित फुक्क निकाय सक्रिय जुइमाःगु खँ धयादीगु दु । अपांगता दुपिं मनूतय्सं २७ औं अन्तर्राष्ट्रिय दिवसया झ्वलय् मन्त्रालय व राष्ट्रिय अपांग महासंघ नेपालं ग्वसाः ग्वःगु ज्याझ्वलय् न्ववानादिसें मन्त्री थापां राज्यया हरेक संरचना अपांगताको समान सहभागिताया निंतिं नीतिगत व्यवस्था यायेत थःम्हं फक्व पहल यायेगु खँ नं धयादीगु दु ।

महासंघया अध्यक्ष सुदर्शन सुवेदीं अपांगतामैत्री भौतिक संरचनाया निंतिं सरकारं हे कडा नीति दयेकाः उकिया प्रभावकारी कार्यान्वयन यायेमाःगु माग यानादिल । लिपांगु इलय् प्रधानमन्त्रीया ज्याकु, अर्थ मन्त्रालय, महिला बालबालिका तथा समाज कल्याण मन्त्रालय, येँ जिल्ला अदालत लगायतया सरकारी ज्याकूया भौतिक संरचनाय् छुं हद तक अपांगतामैत्री दयेकेगु ज्या जूगु दु ।

अपांगतामैत्री भौतिक संरचनाया निंतिं सरकारं हे कडा नीति दयेकाः उकिया प्रभावकारी कार्यान्वयन यायेमाः

अथेहे चन्द्रागिरी हिल्स प्रालि, सिटिसी मल सुन्धारा, ग्राण्डी अस्पताल, लाबिम मल, आदर्श सउला युवक मावि, नाङ्लो बेकरी न्हू बानेश्वर व धरहरा लगायत छुं छुं होटल व क्याफे नं अपाङ्तामैत्री संरचना दयेकातःगु दु । थ्व दँया अपाङता दिवस ‘अपाङ्ता दुपिं व्यक्तिया सशक्तिकरण तथा समावेशी व समानताया सुनिश्चितता’ धयागु नारा बियाः हंगु खः ।

ज्याझ्वः सुरु जुइ न्ह्यव कमलादीइ च्वंगु नेपाल प्रज्ञा प्रतिष्ठानय् पदयात्रा सुरु जूगु खः । कमलादीं सुरु जूगु पदयात्रा घण्टाघर, जमल जुयाः लैनचौरय् च्वंगु समाज कल्याण परिषदय् थ्यंकाः क्वचायेकूगु खः ।

पदयात्राय् दुथ्याःपिं अपांगता दुपिंसं ‘सांकेतिक भाषा, दोषभाषेया उत्पादन व परिचालनय् लगानीया’, ‘जितः नं गणना या, समावेश या’, ‘अपांगता दुपिं मनूतय् सशक्तिकरण व समावेशीता तथा समानताया सुनिश्चितता’, ‘मनोसामाजिक अपांगता व्यक्तिया दोष मखसे गलत सामाजिक अवधारणा व भेदभावया उपच खः’, ‘अपांगता दुपिं मनूतय् अधिकारसम्बन्धी ऐन कार्यान्वयन या’ धयागु नारा दुगु प्ले कार्ड ज्वनावःगु खः ।

नेपाःया लिपांगु जनगणना कथं अपांगता दुपिं मनूतय् ल्याः मुक्कं जनसंख्याया १.९४ प्रतिशत, अथे धयागु न्यागू लाख १३ हजर ३२१ म्ह दु । थुकी शारीरिक अपांग्ता दुपिं ३६.६ प्रतिशत, दृष्टिविहीन १६.५ प्रतिशत, न्यनेगुली समस्या दुपिं १५.४ प्रतिशत दु । अथेहे न्ववायेगु सम्बन्धी अपांगता दुपिं ११.५ प्रतिशत, श्रवण दृष्टिविहीन सम्बन्धी १.८, मानसिक अपांगता ६, बौद्धिक अपांगता २.९ व बहुअपांगता ७.५ प्रतिशत दु ।