ललितमण्डप पुलांगु डिजाइनं पुनर्निर्माण याइगु

यल (नेपालभाषा टाइम्स)- यलया जाह्वलाख्यलय् च्वंगु ललितमण्डप पुनर्निर्माण याइगु जूगु दु । यल महानगरपालिका ४ वडा जाह्वलाख्यलय् लाःगु मन्दः यल महानगरपालिकां पुननिर्माण यायेत्यंगु खः । यल महानगरं ललितमण्डपया लिक्क च्वंगु फल्चा व जावलाहिति न्हापा हे पुननिर्माण यायेधुंकूगु दु ।

ललितमण्डप ऐतिहासिक शैलीं पुननिर्माण यायेगु निंतिं विस्तृत परियोजना प्रतिवेदन (डिपिआर) तयार जुइधुंकूगु खँ यल महानगरपालिका वडा ४ या अध्यक्ष सन्तोष खड्कां कनादीगु दु । वय्कःया कथं आः राणाकाल न्ह्यःया गुकथं दयेकातःगु खः उगु कथं मन्दः दयेकीगु जुइ । राससलिसे खँ ल्हासें वय्कलं धयादीगु दु, ‘थौंकन्हय् दुगु भवन पञ्चायतकालय् दयेकूगु खः । जिमिसं राणाकाल स्वयां न्ह्यःया किपा लुइकागु दु । आः इतिहास झल्के जुइकथं ललितमण्डप पुनःनिर्माण जुइ ।’

बुंगद्यः सालीबलय् जात्राया अन्तिम न्हि कुन्हु ललितमण्डपय् बुंगःद्यः तयेहइगु खः । थन हे भोटो जात्रा जुइ । थौंकन्हय् जावलाख्यलय् बुंगद्यःया संग्रहालय नं दयेकेगु ज्या जुयाच्वंगु दु । थ्व संग्रहालयय् बुंगद्यःलिसे सम्बन्धीत सामग्रीत दइगु खँ धाःगु दु ।

वडाअध्यक्ष खड्का आः ज्यापु समाजलिसे सहलह यानाः कलात्मकढंगं ललितमण्डप पुनःनिर्माण यायेगु खँ धयादीगु दु । ‘ललितमण्डप दयेकेगु खँय् नगरप्रमुखलिसे नं खँ जुइधुंकूगु दु, वय्कलं नं दयेकेगु निंतिं धयादीगु दु’ वडाध्यक्ष खड्कां धाःगु दु ।