लः बुलुगु कारण प्रशोधन केन्द्र

स्वनिगःवासीतय् छेँय्छेँय् लः वितरण याइगु प्रमुख केन्द्र खः, सुन्दरीजल । थ्व हे सुन्दरीजलं वितरण जुइगु लः बांलाक प्रशोधन मजुल धाःसा यायेगु छु ? धायेगु छु ? सुन्दरीजलं स्वनिगलय् वितरणया निंतिं हयातःगु बागमतिया लः बांलाक प्रशोधन यायेगु ज्या मजूगुलिं छेँय्छेँय् हितिं हाइगु लः बुलुसे च्वनाच्वंगु दु ।

सुन्दरीजल प्रशोधन केन्द्रय् च्वंगु खुगू प्रशोधन केन्द्रमध्ये थौंकन्हय् निगू जक प्रशोधन केन्द्र संचालन जुयाच्वंगु दु । वि.सं. २०२२ सालय् निर्माण जूगु प्रशोधन केन्द्र आतक नं मर्मत यायेगु ज्या जूगु मदुनि । केन्द्रं नं लः प्रशोधन हे याये मफइगु स्थिति वयेवं प्यंगू प्रशोधन केन्द्र मर्मत यायेगु शुरु यानागु सुन्दरीजल प्रशोधन केन्द्रया ज्याकूया प्रमुख वसन्तकुमार पालं कनादिल ।

हितिं वइगु लः त्वनेगु ला खँ हे त्वःते वसः हिइत व म्वःल्हुइत तकं ज्या मवः । अपाय्सकं बुलुगु लः वयेवं समता मानव अधिकार तथा नागरिक समाजं प्रशोधन केन्द्रया स्थलगत अनुगमन तकं याःगु दु ।हितिं लः मवइगु, व हे वःसां बुलुसे च्वंगु लः वइगु जुइवं त्वनेगु लःया हाहाकार जुयाः मुहानय् वनाः अनुगमन यायेमाःगु अवस्था वःगु समाजया अध्यक्ष नोर्साङ शेर्पां कनादिल ।

‘प्रशोधन यायेगु प्रयोजनया निंतिं राज्यया ध्यबा खर्च यायेमाःगु आवश्यक जूगुलिं शुद्ध त्वनेगु लः त्वने दयेमाःगु नागरिकया मौलिक हकया रक्षा जुइमाः, केन्द्रया ज्याकुथिइ व आवश्यक मात्राय् कर्मचारीत तकं मदुगु खनेदत, स्वनिगलय् अप्वः लः वनीगु केन्द्रया हालत थुभनं दयनीय जुइ मजिल, सुधार जुइमाः’ वय्कलं धयादिल ।

काठमाडौं उपत्यका खानेपानी लिमिटेडया आयोजना कार्यान्वयन निर्देशनालयं सुन्दरीजलय् २०७०लय् निर्माण याःगु ‘डिस्इन्फेक्सन प्लान्ट’ (शुद्घिकरण यायेगु उपकरण) संचालन जुइ मफुगुलिं नं आधुनिक प्रविधिपाखें लः प्रशोधन जुइ मफयाच्वंगु ज्याकूया प्रमुख पालं स्वीकार यानादिल ।

‘प्रशोधन यायेत रासायनिक पदार्थ नं गाक्क मदु, ‘डिस्इन्फेक्सन प्लान्ट’ संचालन मजू धकाः निर्देशनालययात पौ च्वया छ्वयेगु ज्या जूसां न त उकिया लिसः हे वल, न त दयेकेगु ज्या हे जुल’ वय्कलं धयादिल ।सुन्दरीजल क्षेत्रय् वनेबलय् साक्क व शुद्ध लः त्वने दइ धइगु सकसिनं अनुमान यानाच्वंगु दइ । मुहान च्वय्या बस्तीया कारणं नं बर्खां वा वइगु इलय् लः प्रदूषित जुइगु यानाच्वंगु स्थानीय सन्दीप लामाया धापू दु ।

‘लःया मुहान च्वय्या बस्तीइ भुखाचं छेँलिसें चःबि नं दुनावन, आपालं चःबि आतक नं पुनःनिर्माण जुइ फयाच्वंगु मदु, खुल्ला चःबि अनया बाध्यता जुयाच्वंगु दु, बर्खां वा वइगु इलय् लः बाः वइबलय् फोहर लः पुखुलिइ हे कुहां वइ’ वय्कलं धयादिल । केन्द्रय् च्वंगु लः मुंकातइगु पुखूया च्वय् च्वंगु मूलखर्क, चिलाउने, ओखरेनी, कुने लगायतया बस्ती मेगु थासय् ल्ह्ययेत वंगु स्वीदँ न्ह्यवंनिसें हे बहस न्ह्यानाच्वंगु खःसां आतक छुं निष्कर्ष पिकाये फुगु मदुनि ।

बस्ती स्थानान्तरण व सुचुकुचु अभियान निगुलिं न्ह्यःने न्ह्याः मवंगुलिं उपभोक्ता धाःसा थःगु छेँय् बल्लबल्ल वःगु बुलुसे च्वंगु लः जक स्वयाच्वनेत बाध्य जुयाच्वंगु दु । हितिं वःगु लः त्वन धाःसा कथु स्याइगु, म्वःल्हुत धाःसा म्ह चासुया वइगु थेंज्याःगु समस्या खने दयाच्वंगु दुसा वसः हिइबलय् नं रङ हे वनीगु वा रङ हिलीगु थेंज्याःगु समस्या वयेगु यानाच्वंगु दु ।

संविधानय् त्वनेगु लःयात मौलिक हकया रुपय् न्ह्यथनातःगु जूसां स्वनिगलय् लः अप्वः दइगु थाय्कथं म्हसियाच्वंगु मुहान क्षेत्रया अवस्था हे दयनीय जुयाच्वंगु दु । सुन्दरीजल लः प्रशोधन केन्द्रया तःक्वः तःक्वः अनुगमन यानाः सेवाया गुणस्तर सुधार यायेत लिमिटेडयात बिउगु निर्देशन बेवास्ता यायेगु ज्या जुयाच्वंगु खानेपानी महसुल निर्धारण आयोगया अध्यक्ष उपेन्द्रकुमार अधिकारीं कनादिल ।

‘प्रशोधन केन्द्र जीर्ण जुजुं वनाच्वंसां दँदँ न्ह्यःनिसें बियातःगु निर्देशनकथं बल्ला मर्मत शुरु यानाः कार्यान्वयनपाखे वंगु दु, आपालं थासय् मूल पाइपं हे लः वितरण व लः खुया कायेगु ज्या जुयाच्वंगु दु, थ्व सम्बन्धी विवरण पेश यायेत आयोगं बिउगु निर्देशन नं लिमिटेडं माने यानाच्वंगु मदु’, वय्कलं धयादिल ।

न्हूगु स्थापना याःगु प्लान्टं एमोनिया थेंज्याःगु ब्याक्टेरिया प्रशोधन जुइ मफइगु धाःगु दु । सुन्दरीजलं स्वनिगलय् बर्खाया इलय् न्हियान्हिथं ९ करोड लिटर लः व चिकुलाया इलय् ६ करोड लिटर लः आपूर्ति यायेगु ज्या जुयाच्वंगु लिमिटेडं न्ह्यथंगु दु ।

 

सम्बन्धित बुखँ

LEAVE YOUR COMMENTS