यक्व थासय् पुलांपिं पासापिनि दथुइ हे भिडन्त

येँ (नेपालभाषा टाइम्स)- प्रतिनिधि सभाया १६५ सिट व न्हय्गू प्रदेशया ३३० सिटया लागिं जुइत्यंगु थ्व चुनावय् देय्न्यंकं द्वलंद्वः उम्मेदवारतय्सं मनोनयन दर्ता याःगु दु । छुं ई न्ह्यः जक तःधंगु पार्टी एमाले विभाजन जूगुया लिसें चुनावया लागिं निगू अलग अलग गठबन्धन दयेकूगु जुयाः थ्व चुनावया भिडन्त रोचक जुइगु अनुमान याना हःगु दु ।

येँया १ नम्बर क्षेत्रय् कांग्रेसया प्रकाशनमान सिंह व राप्रपाया रविन्द्र मिश्र दथुइ भिडन्त जुइगु खनेदु । वंगु चुनावय् मेगु हे पार्टीं दंम्ह मिश्र छुं भचा जक भोटं बूगु खः ।

थ्व चुनावय् येँया क्षेत्र नं. १ पाखें नेपाल प्रहरीया पुलांम्ह उपमहानिरीक्षक रमेश खरेल दनाच्वंगु दुसा क्षेत्र ६ पाखें वय्कःया हे प्रतिद्वन्द्वी प्रहरी महानिरीक्षक सर्वेन्द्र खनाल नं दनाच्वंगु दु ।

क्षेत्र नं. ७ य् जसपाया राजेन्द्र श्रेष्ठ व जसपां त्याग याना वःगु गठबन्धनया मानुषी यमि भट्टराई दथुइ धेंधेंबल्लाः जुइगु खनेदु । अन एमालेपाखें श्याम घिमिरे नं मैदानय् दु ।

क्षेत्र नं. ८ य् धाःसा एमालेया अष्टलक्ष्मी शाक्यं चुनाव ल्वाये मखु धायेवं पुलांम्ह जिसस शिवभक्त वैद्ययात थंगु दु । अन नेकपा (एस) या जीवनराम श्रेष्ठ बल्लाःम्ह उम्मेदवार दु ।

झापाय् एमालेया अध्यक्ष केपी ओलीयात बुकेगु धइगु हे लक्ष्य तयाः नांजाःम्ह च्वमि युग पाठकं उम्मेदवारी बियादीगु दु । सप्तरीइ जसपाया उपेन्द्र यादव विरुद्ध जनमत पार्टीया सीके राउतं उम्मेदवारी बियादीगु दु । कलाकार रेखा थापां नं मोरङ ३ पाखें उम्मेदवारी दर्ता यानादीगु दु ।

ख्वप क्षेत्र नं. १ य् नेमकिपापाखें पुलांम्ह हे सांसद प्रेम सुवालं उम्मेदवारी दर्ता यानादीगु अन कांग्रेसपाखें सुनिल बाबु गोठे व एमालेपाखें नवराज गेलालं उम्मेदवारी बिउगु दु ।