जग्गा कारोबारीयात दायाः स्यानाबिल

ख्वप (नेपालभाषा टाइम्स) – थनया सुडालय् च्वंम्ह छम्ह जग्गा कारोबारीयात दा जक दायाः स्याना बिउगु दु। स्थानीय लामा थरया जग्गा कारोबारीयात वया हे पासापिंसं दायाः स्याना बिउगु खँ धाःगु दु ।

छुं दिं न्ह्यः मोटरसाइकलय् वःपिं निम्हेसिनं लामायात वयागु छेँ न्ह्यःने च्वंगु फल्चाय् च्वनाः बियर त्वंकाः लिपा जग्गा स्वयेमाल धकाः छगू किलोमिटर च्वय् च्वंगु बिदोल धइगु थासय् ब्वना यंकूगु खःसा अन हे वयात दा जक दायाः स्याना बिउगु खः । छाति व छ्यनय् तसकं घाः जूगु अवस्थाय् लिक्कसं च्वंगु अगलय् ज्या याइपिंसं खंकाः प्रहरीयात खबर याःगु खः ।

लिपा वासः यायेत यंकूगु इलय् अस्पतालय् वयात मृत घोषणा याःगु खः । न्हापां मध्यपुर थिमि अस्पताल यंकूम्ह वयात लिपा बीएनबी अस्पताल यंकूगु खः । लामाया छेँजःयाकथं पसः न्ह्यःने च्वंगु सीसी क्यामराय् कोरोबारय् संलग्न जूपिं खने दुसां माक्स तयातःगुलिं इमिगु ख्वाः धाःसा स्पष्ट मजू । प्रहरीं घटनाय् प्रयोग जूगु मोबाइल व नम्बर ट्रेसिंग यानाः खिचा हयाः घटनास्थलया फोटो कया यंकाः अनुसन्धान यानाच्वनागु खँ धाःगु दु।घटनाय् लामालिसे कारोबार याःपिनिगु प्रत्यक्ष संलग्नता खने मदुगु व पेशेवर कन्ट्याक्याट किलरया प्रयोग याःगु खयेमाः धइगु आशंका प्रहरीं याःगु दु ।