लाइसेन्स कायेमानीपिं गुंगू लाख
चालक अनुमतिपत्र (लाइसेन्स)या निंतिं आवेदन बिउपिं झण्डै गुंगूत्या लाख सेवाग्राहीं चालक अनुमतिपत्र काये खनाच्वंगु मदु । सरकारयात बुझे यायेमाःगु राजस्व पूगु दछि पुलेधुंकूपिं सेवाग्राहीं नं आतक नं चालक अनुमति पत्र काये खनाच्वंगु मदु । सरकारं प्यदँ न्ह्यव हे ‘स्मार्ट’ चालक अनुमतिपत्र शुरु याःगु इलंनिसें हे सेवाग्राहीं इलय् चालक अनुमतिपत्र काये खनाच्वंगु मदु ।
देय्न्यंकंया दक्वं यातायात व्यवस्था ज्याकूपाखें परीक्षा उत्तीर्ण याःपिनिगु चालक अनुमतिपत्र छापे यायेगु ज्या यातायात व्यवस्था विभागं याना वयाच्वंगु दु । विभागय् दुगु मुद्रण यन्त्र (छपाइ मेशीन)या क्षमता स्वयां अप्वः कार्ड छापे यायेमाःगुलिं सेवाग्राहीं इलय् चालक अनुमतिपत्र काये मखनाच्वंगु विभागं न्ह्यथंगु दु ।
विभागय् थौंकन्हय् गुंगू उपकरण दुगुलिइ उकीमध्ये खुगू न्हय्गुलिं जक नियमित रुपं ज्या यानाच्वंगु विभागया प्रवक्ता तीर्थराज खनालं कनादिल । वय्कःयाकथं छगू उपकरणया क्षमता धइगु न्हिछिया दुने नीन्यासः निसें स्वद्वः तक छापे यायेगु खः । छन्हुया दिनय् अप्वलय् झिंच्याद्वः तक छापे यायेगु ज्या जुयाच्वंगु विभागं न्ह्यथंगु दु ।
वय्कलं धयादिल, ‘थ्व हे गतिइ छापे यानाच्वनेबलय् थन छापे याये ल्यं दुगु लखौं चालक अनुमतिपत्र छापे याये फइमखु ।’उपकरणय् इलय्व्यलय् समस्या वयाच्वनीगु विभागं न्ह्यथंगु दु । प्रवक्ता खनालयाकथं उपकरणय् समस्या वइबलय् मर्मतया निंतिं भारतं प्राविधिक वयेमाःगु बाध्यता दु ।
जर्मनी कम्पनीया उपकरणय् समस्या वइबलय् नं इलय् मर्मत मजुइगुलिं यानाः नियमित रुपय् संचालनय् वये मफयाच्वंगु वय्कलं धयादिल । वय्कलं धयादी, ‘आः नं निगू उपकरण मर्मत जुइ मफुगुलिं अथें लानाच्वंगु दु ।’ सरकारं सेवाग्राहीयात इलय् हे चालक अनुमतिपत्र उपलब्ध याकेत ‘मास प्रिन्टर’ न्यायेगु प्रक्रिया न्ह्याकूगु दु ।
मास प्रिन्टर न्ययोत ठेक्का सम्झौता जुइधुंकूगु प्रवक्ता खनालं धयादिल । मास प्रिन्टरया घौछिया दुने ४३० चालक अनुमतिपत्र छापे यायेगु क्षमता दु । वय्कलं धयादिल, ‘मास प्रिन्टर न्यायेवं थ्व समस्या ज्यनी ।’स्मार्ट चालक अनुमतिपत्र छापे यायेगु ज्याय् जुयाच्वंगु ढिलासुस्तीया कारणं सेवाग्राहीत नं हैरान जुयाच्वंगु दु ।
ख्वपया अनन्त नेपाल स्मार्ट चालन अनुमतिपत्र दयेकेधुंकूगु खः वा मखु धइगु थुइकेत स्वक्वः तक ज्याकुथिइ थ्यनं नं दयेकूगु मदुनि धासें लिहां वयाच्वनेमाःगु वय्कलं धयादिल । वय्कलं ख्वपया जगातिं चालक अनुमतिपत्रया निंतिं परीक्षा पास यानादीगु खः । स्वक्वःतक नं अन ज्या याइपिं कर्मचारीं विभागपाखें हे तयार जुयाः मवःनिगु धासें वय्कः बुझे यायेत विभागय् तकं थ्यंकादिल ।
विभागं चालक अनुमतिपत्र दयेकेवं ज्याकुथिइ हे वनीगु व ज्याकुथिइ नं स्वक्वःतक वनाः नः तयार जुयाः मवयेवं आः गनं हे वनेगु त्वःता बियागु वय्कलं धयादिल । सतकय् छड्के जांच जुइगु इलय् वय्कलं राजस्व पुलागु भ्वं क्यनाः वनेगु यानाच्वनादीगु दु । वय्कलं धयादिल, ‘रसिद नम्बर नं आः बुझे जुइगु स्थितिइ मदयेधुंकूगुलिं लेमिनेशन यानाः ज्वना जुयागु दु ।’
सरकारं आधुनिक प्रविधिया प्रयोग यायेगु धासें ल्हातं च्वयातःगु कार्डयात ‘स्मार्ट’ चालक अनुमतिपत्रं विस्थापित यायेगु लक्ष्य काःसां नं आवश्यकता स्वयां म्हो जक छापे जुयाच्वंगुलिं सेवाग्राहीं इलय् चालक अनुमतिपत्र काये मखनाच्वंगु खः । विभागं फक्व याकनं यायेगु धासें छुं ई न्ह्यः निजी कम्पनयिात चालक अनुमतिपत्र छापे यायेगु जिम्मेवारी बिउगु खः ।
निजी कम्पनीं चालक अनुमतिपत्र छापे याःबलय् रंगीन त्वपुयातःगु प्रवक्ता खनालं धयादिल । रंगीन छापे याःबलय् गुलिसियां किपा, गुलिसियां नां, थाय्बाय्, हि पुचः लगायत विवरण स्पष्ट मजू । निजी कम्पनीइ छापे यायेबलय् झन् अप्वः समस्या वयेवं आः विभाग थम्हं हे श्यामश्वेत (ब्ल्याक एण्ड ह्वाइट) कार्ड छापे यानाच्वंगु दु ।
वंगु फागुनतकया दुने विभागं देय्न्यंकंया ज्याकूपाखें न्यागू लाख न्यय्न्हय्द्वः २९८ स्मार्ट चालक अनुमतिपत्र वितरण याःगु खः । आर्थिक दँ २०७४÷७५ य् निगू लाख ग्वीच्याद्वः १७५ चालक अनुमतिपत्र वितरण जूगु खः ।
न्हूगु संविधानकथं यातायात व्यवस्थापनया जिम्मेवारी प्रदेश सरकारया खः । संघीय सरकारं थगुने मंसिरय् यातायात व्यवस्था ज्याकूयात भौतिक पूर्वाधार विकास मन्त्रालययात हस्तान्तरण यायेधुंकूगु दु । प्रदेश सरकार थम्हं हे कार्ड छापे यायेगु ज्या मन्ह्याकूगुलिं संघीय सरकारं हे थ्व ज्या याना वयाच्वंगु खः ।
LEAVE YOUR COMMENTS