स्कुल बन्द मयायेत सुझाव

येँ – कोरोना भाइरस संक्रमणयात क्यनाः तत्काल विद्यालय बन्द मयायेत सरोकारवालापिंसं सल्लाह बिउगु दु । शिक्षा, विज्ञान तथा प्रविधि मन्त्रालयं सोमवाः ग्वसाः ग्वःगु ज्याझ्वलय् विद्यालय संगठनया प्रतिनिधि, अभिभावक संघया प्रतिनिधिपिंसं उगु सुझाव बिउगु खः ।

सहलह ज्याझ्वलय् न्ववायेगु झ्वलय् सरोकारवालातय्सं विद्यालय चायेकेगु वा मचायेकेगु धयागु निर्णय यायेगु अधिकार स्थानीय निकाययात बीमाःगु सुझाव बिउगु खः । नेपाल नगरपालिका संघया अध्यक्ष अशोक ब्याञ्जुं छगू थासय् कोरोना भाइरसया संक्रमण अप्वयेवं देय्न्यंकंया विद्यालय बन्द यायेगु व्यवहारिक मजुइगु धासें गन कोभिड संक्रमणया जोखिम अप्वया वन अनया जक विद्यालय बन्द यायेगु उचित जुइगु सुझाव बियादीगु खः । वय्कलं धयादिल, ‘गुगु थासय् संक्रमण अप्वया वन, उगु थाय्या स्थानीय सरकारं अनया स्कुल बन्द यायेगु अधिकार बीमाः ।’

एन–प्याब्सनया महासचिव सुवास न्यौपानें हल्लाया भरय् विद्यालय बन्द यायेमजिउगु खँ धयादीगु खः । वय्कलं धयादिल, ‘न्ह्याथेंज्याःगु प्रकोपया अवस्थाय् नं मस्तय्त आखः ब्वनेगुपाखें बन्चित याये मजिउ, कोरोना भाइरसया संक्रमण उच्च जुयाच्वंगु इलय् राजनीतिक नेतृत्वं जुलुस यायेबलय् संक्रमण मजुइगु तर स्वास्थ्य मापदण्ड नालाः मस्तय्त ब्वंकेबलय् विद्यालय बन्द यायेमाःगु खँ जिमित स्वीकार्य मजू ।’
वय्कःया धापु दु, ‘कोरोना भाइरस संक्रमण क्लाइमेक्सय् थ्यंगु इलय् सतकय् वयाः नेतापिसं नारा जुलुस यायेजिउ, अन भाइरस संक्रमण मजुइगु, अले जिमिसं स्वास्थ्य प्रोटोकल नालाः स्कुल सञ्चालन यायेबलय् कोरोना संक्रमण जुइगु ? थज्याःगु खँ जिमित स्वीकार्य जुइमखु ।’

अथे हे सामुदायिक विद्यालय व्यवस्थापन समिति महासंघया अध्यक्ष कृष्णबहादुर थापां विद्यालय बन्द यायेगु खःसा मस्तय्गु सयेकेगु व ब्वनेगु अधिकार सुनिश्चित जुइमाःगु खँ धयादीगु दु । वय्कलं सरकारं मस्तय्गु सयेकेगु अधिकार सुनिश्चित मयाःगु धासें न्ह्यसः तयादिल, ‘आः विद्यालय बन्द यायेगु खःसा मस्तय्त स्यनेगु सुनिश्चितता यायेगु योजना छु खः ? सुनाप च्वना प्लानिङ यायेगु, न्हापांगु खँ मस्तय्त स्यनेगु सुनिश्चितता खः, मेगु खँ बन्द यायेगु खःसा सुरक्षाया सुनिश्चितता जुइमाल ।’

उकथं हे ज्याझ्वलय् न्ववायेगु झ्वलय् विश्वविद्यालय अनुदान आयोगया अध्यक्ष डा. भीमप्रसाद सुवेदीं भौगोलिक विविधतायात ध्यानय् तयाः विकेन्द्रीकरण प्रक्रियां विद्यालय सञ्चालन यायेमाःगु खँ धयादीगु दु । वय्कलं न्ह्यःने धयादिल, ‘स्वास्थ्य मापदण्डय् गुगुं नं कथं कम्प्रोमाइज मयाये, स्वंगू खँय् समन्वय यानाः न्ह्याःवने– स्थानीय तह जिम्मेवार दु, व्यवस्थापन समिति जिम्मेवार दु, शिक्षकपिं जिम्मेवार दु, वय्कःपिसं वस्तुस्थितिया विश्लेषण यानादी, उगु हे विश्लेषणया आधारय् न्ह्याःवनेमाः ।’

उकथं हे राष्ट्रिय परीक्ष बोर्डया अध्यक्ष डा. चन्द्रमणि पौडेलं केन्द्रीकृत रुपं फुक्कं शिक्षा संस्था तत्काल बन्द यायेमाःगु अवस्था मदुगु खँ धयादीगु दु । वय्कलं वर्तमान अवस्थाय् दीर्घकालीन व अल्पकालीन रुपं रणनीति दयेकाः न्ह्याःवनेमाःगु सुझाव बियादीगु दु ।
स्वास्थ्य मन्त्रालयं कोरोना संक्रमण अप्वया वःगु व मस्तय्त संक्रमण जुइगु नं अप्वःया वःगु धासें स्कुल बन्द यायेत सुझाव बिउगुलिं शिक्षा मन्त्रालयं थ्व सहलह ज्याझ्वः याःगु खः ।

सम्बन्धित बुखँ

LEAVE YOUR COMMENTS