सोमवाः निसें मोटरसाइकल दर्ता

येँ – सोमवाः निसें मोटरसाइकल दर्ता प्रक्रिया न्ह्याकेगु खँ धाःगु दु । मोटरसाइकल दर्ता यायेत निगू डिजिट ल्याः ९९ थ्यनेधुंकाः स्वंगः डिजिट दुगु मोटरसाइकल दर्ता यायेगु निंतिं कानुनी रुपं समस्या वयेवं मोटरसाइकल दर्ता यायेगु ज्या दिकूगु खः । विभागं छु मोडलय् मोटरसाइकल दर्ता यायेगु धइगु प्रस्ताव मन्त्रिपरिषदय् छ्वःगु खः ।

आः दर्ता जुइगु मोटरसाइकलय् स्वंगः डिजिट थप जुयाः दर्ता जुइगु खँ विभागं धाःगु दु । मोटरसाइकल दर्ता ज्या दीवं सरकारयात दर्ता पाखें वइगु राजश्व नं घाटा जूगु दु । विभागया कथं थौंकन्हय् देय्न्यंकं ३२ लाख सवारी साधन दर्ता जुइधुंकुगु दुसा उकि दकलय् अप्वः मोटरसाइकल दर्ता जुयाच्वंगु दु । देय्न्यंकं २५ लाख मोटरसाइकल दर्ता जुइधुंकूगु दुसा बागमति अञ्चलय् जक १० लाख मोटरसाइकल दर्ता जुइधुंकूगु दु ।