स्वनिगःया औद्योगिक क्षेत्र चीकेगु ग्वसाः

येँ (नेपालभाषा टाइम्स)- स्वनिगःया घनाबस्ती दुने हे पलिस्था यानातःगु औद्योगिक क्षेत्रतय्त अनं पिने छ्वयेगु धकाः सरकारं च्यादँ न्ह्यः हे योजना हःगु खःसां आः तक पित छ्वये धाःसा फयाच्वंगु मदुनि । लिसें पित छ्वयेगु लागिं छुं कथंया ठोस पलाः नं न्ह्याके फुगु मदुनि ।

थौंकन्हय् येँया बालाजु औद्योगिक क्षेत्रय् १३५ गू उद्योग सञ्चालन जुयाच्वंगु दुसा मेगु प्यंगू न्हूगु दयेकाच्वंगु दु । अथे हे यलया औद्योगिक क्षेत्रय् १११ गू उद्योग सञ्चालनय् दुसा मेगु प्यंगू न्हूगु दयेकाच्वंगु दु । ख्वपय् ३८ गू उद्योग सञ्चालनय् दुसा मेगु छगू न्हूगु उद्योग निर्माणाधिन अवस्थाय् लानाच्वंगु दु ।

स्वनिगलय् थीथी कथंया प्रदुषण न्यंकेगु ज्या यात धासें सरकारं विसं २०७४ सालय् हे थ्व औद्योगिक क्षेत्रत थनं पिने छ्वयेगु धकाः नीति समेत दयेकाः सार्वजनिक याःगु खः ।
तर स्वनिगःया थ्व औद्योगिक क्षेत्र मेथाय् सारे यायेगु योजनायात उद्योगीतय्सं धाःसा स्वीकार याःगु मदुनि । उद्योग सारे यायेबलय् सिर्जना जुइगु दायित्वया बोझ उद्योगतय्सं फये फइ मखु धयाच्वंगु दु ।

बालाजुइ औद्योगिक क्षेत्र चायेकूगु ६० दँ दयेधुंकल । उगु इलय् अन बस्ती धइगु हे मदु । आः थनं औद्योगिक क्षेत्र सारे यानाः न्हूगु थासय् यंकल धाःसा कन्हय् अन नं बस्ती विकास जुया वल धाःसा छु यायेगु धकाः उद्यमीतय्सं न्ह्यसः तःगु दु । उद्योग सञ्चालन धइगु मनूया डेरा सरे याये थें सरे याना च्वनेगु विषय मखु धासें न्हूगु थासय् नं बस्ती विकास जुयाः हानं अनं नं मेथाय् सारे याये माल धाःसा उकिया क्षतिपूर्ति सुनां याइ धकाः नं उमिसं न्ह्यसः तःगु दु ।

सरकारं स्वनिगःया उद्योगत चीका छ्वयेगु धाःसां गन तयेगु धकाः धाःसा छुं निर्णय याये फुगु मदुनि ।