ज्या संघीय सरकारया उजुरी स्थानीय सरकारय्

येँ महानगरया स्वंगू थासय् निर्माण जूगु सतक छुं दिं लिपा हे ब्वला वल धकाः येँ महानगरपालिकाय् उजुरी लात । येँ महानगरपालिकाया स्वंगू बिस्कं बिस्कं वडाय् जूगु सतक निर्माणय् जूगु समस्या छु खः धकाः थुइकेत स्वःगु इलय् स्वंगुलिं हे थासय् येँ मनपां सतक निर्माण मयाःगु खँ सीदत ।

संघीय सरकारं सतक निर्माण याःगु खःसां येँ मनपा दुने लाःगु सतक जूगुलिं स्थानीयवासीं येँ महानगरय् थःपिनिगु गुनासो यायेत वःगु खः ।
येँ मनपां वंगु आर्थिक दँय् महाराजागंज, चाबही लगायतया थासय् आकासे ताँ निर्माण यायेगु योजना दयेकूगु खः । महाराजगंज चोकय् चीन सरकारया ग्वाहालिइ चक्रपथ विस्तारया ज्या जुइत्यंगु दुसा चाबहिलिइ नं सरकारं सतक विस्तार यानाच्वंगु दु ।

थ्व हे कारणं येँ मनपां थःगु पूर्व योजनाकथं आकाशे ताँ निर्माण याये मफयाच्वंगु खः । आः नं येँया आपालं चोकय् येँ मनपां आकाशे ताँ दयेकेगु योजना दयेकाच्वंगु दुसा संघीय सरकारं नं व हे थासय् ‘फ्लाइ ओभर’, ‘अण्डरपास’ वा ‘सव वे’ दयेकेगु धकाः योजना हयाच्वंगु दु ।
येँ मनपा दुने जुयाच्वंगु वा जुइधुंकूगु विकास निर्माणया विषयय् महानगर अनभिज्ञ जूगु थुपिं निगू दसु जक खः ।

‘गांगामय् सिंहदरवार’ धइगु नारालिसें न्हूगु संविधानय् स्थानीय तहयात जिम्मेवार व अधिकार सम्पन्न यानातःगु दु । संघीय राजधानी येँ दुगु व दकलय् अप्वः जनसंख्या च्वना वयाच्वंगु येँ मनपायात धाःसा थःगु हे क्षेत्र दुने जुयाच्वंगु विकास निर्माणया बारे जानकारीतकं मदु ।

जनतालिसे प्रत्यक्ष रुपं सम्पर्क दइगु जूगुलिं महानगर दुने जुयाच्वंगु सकतांकथंया विकास निर्माणया बारे जनतां महानगरयाके हे न्ह्यसः तयेगु यानाच्वंगु येँ महानगरया प्रवक्ता ईश्वरमान डंगोलं कनादिल ।वय्कःयाकथं थन जुयाच्वंगु निर्माणय् गुगुं कथंया समस्या वल धाःसां नं जनता येँ मनपाय् वयाः न्ह्यसः तयेगु यानाच्वंगु दु ।

तर समस्या गुकथं वल धइगु बारे जक मखु छु गुगु निकायं निर्माण यानाच्वन धइगु बारे तकं येँ मनपायात जानकारी मदुगु वय्कलं कनादिल । वय्कलं धयादिल, ‘महानगरवासीं जिमित न्ह्यसः तयेगु स्वाभाविक खः तर जिमित नं उकिया लिसः मेमेगु निकायय् मालाच्वनेमाःगु दु ।’

मदिक्क वयाच्वंगु वाया कारणं वंगु वालय् धरहरा–त्रिपुरेश्वर सतक जलमग्न जूगु खः । सतकया लः व्यवस्थापन यायेगु जिम्मेवारी शहरी विकास मन्त्रालय, खानेपानी तथा ढल निकास विभागया जूगुलिं थःपिं स्व जक स्वयाः च्वनेमाःगु प्रवक्ता डंगोलं कनादिल । स्थानीयवासी लःया निकास बीमाल धकाः येँ मनपाय् धाः वःगु खः ।

वय्कलं धयादिल, ‘तर जिपिं थःपिं हे थःगु अधिकार क्षेत्रय् मलाःगुलिं स्व जक स्वयाच्वनेमाःगु अवस्था वल ।’येँ मनपाया अप्वःथें सतक संघीय सरकारया अधिकार क्षेत्र दुने लाः । थनया ८ मिटर तकया सतक येँ मनपा व वयां अप्वः ब्या दुगु सतक संघीय सरकारया अधिकार क्षेत्रय् लाः ।

येँ मनपां सहायक सतक निर्माण यायेगु तर उकी हे स्वानाच्वंगु मुख्य सतक थःगु अधिकारय् मलाःगु वय्कःया धापू दु । डंगोलं धयादिल, ‘महानगरवासीयात अःपुइमा धकाः जिमिसं सहायक सतक दयेके तर मुख्य सतक दयेकेगु जिम्मा जिमिगु मखुगुलिं व संघीय सरकारया हे जिम्मा जुइ ।’ येँ मनपाया निर्माण जिम्मेवारी थःपिंत हे बीमाःगु प्रवक्ता डंगोलं धयादिल ।

उलि याये मफुसां महानगरलिसे समन्वय जक याःगु खःसां नं ज्या यायेत सहज जुइगु वय्कलं धयादिल ।थीथी निकायं इलय्व्यलय् थीथी ज्याया निंतिं सतक म्हुइगु यानाच्वंगुलिं नं समस्या वयाच्वंगु व उकियात कयाः नं महानगरपालिकायात हे आक्रोश प्वंकीगु वय्कलं धयादिल ।

‘गबलें मेलम्ची आयोजनां व गबलें ढल निकासं सतक म्हुइगु व ल्हाकेगु ज्या यानाच्वनी तर सुनां यानाच्वंगु, छु यानाच्वन, छु जुयाच्वन धःगु खँ महानगरं स्वयाः हे जक सीके मालाच्वंगु दु’ वय्कलं धयादिल, ‘जिमिसं महानगरलिसे समन्वय यायेमाः धकाः नेपाल सरकारयात नं धया वयाच्वनागु दु ।’

येँ महानगरपालिकां करिब दछि न्ह्यः झण्डै ४५ किलोमिटर सतक कालोपत्र यायेगु व ४० किलोमिटर सतक मर्मत यायेगु ज्या याःगु खः ।
येँ मनपां थीथी थासय् आकाशे ताँ दयेकेगु धकाः हःगु योजना नं प्राविधिक समस्याया कारणं न्ह्याके मफयाच्वंगु वय्कलं धयादिल ।