छेँय् छेँय् वनाः व्यवसाय दर्ता न्ह्यात
ख्वप – सूर्य विनायक नगरपालिकां छेँय् छेँय् वनाः व्यवसाय दर्ता यायेगु अभियान न्ह्याकूगु दु । नगरपालिकाया जनप्रतिनिधि सहित कर्मचारी दुथ्याःगु प्यंगू पुचः दयेकाः व्यवसाय दर्ता अभियान न्ह्याकूगु खँ नगरप्रमुख वासुदेव थापां जानकारी बियादीगु दु । नगरपालिका दुने सञ्चालन जुयाच्वंगु तर दर्ता मजूगु व्यवसाययात दर्ता यायेगु व करया दायराय् हयेगु आज्जु कथं अभियान न्ह्याकागु जानकारी बियादिसें वय्कलं धयादिल, ‘पसः, उद्योग व व्यवासय दर्ता मयासें सञ्चालन जुयाच्वंगु दु, गुलिखे दर्ता जूसां नं नियमित नवीकरण याःगु मदु, व्यवसाययात दर्ता यानाः व्यवस्थित रुपं सञ्चालनय् हयेगु व करया दायराय् हयेगु जिमिगु अभियान खः ।’ सूर्यविनायक चोकया व्यवसायीया व्यवसाय दर्ता यानाः प्रमाणपत्र लःल्हासें थुगु अभियानया उलेज्या नगरप्रमुख थापां उलेज्या यानादीगु खः । व्यवसाय दर्ता अभियान झिगुलिं वडाय् सञ्चालन जूगु खँ नगरपालिकाया सूचना प्रविधि अधिकृत दिपेश खड्कां कनादीगु दु ।नगरपालिकाया प्रशासन शाखाया पुष्कर बरालं नगरपालिकां छन्हुं हे सछिगू व्यवसाय दर्ता यानागु जानकारी बियादिसें थुगु अभियान नगरया फुक्कं व्यवसाय दर्ता प्रक्रियाय् वयेधुंकाः जक क्वचाइगु खँ कनादिल । व्यवसायीयात अःपुकेगु निंतिं पुचलं छेँय् छेँय् वनाः दर्ता यानाः प्रमाणपत्र बीगु यानाच्वंगु दु ।नगरपालिकां वइगु असार मसान्त तक आन्तरिक आम्दानी ८ करोड तका थ्यंकेगु आज्जु कथं अभियान न्ह्याकूगु खः ।
LEAVE YOUR COMMENTS