ने. सं. ११४६ बछलागा षष्ठी -

येँ महानगरं चुरोट व सूर्तीइ कडाइ याइगु

येँ – येँ महानगरपालिका दुने वइगु असोज १ गते निसें सार्वजनिक थासय् चुरोट त्वनेगु व सूर्ती नये मदइगु जूगु दु । येँ महानगरपालिकां छगू सुचं पिथँसें वइगु असोज १ ते निसें सर्वाजनिक थासय् च्वनाः चुरोट, बिडि, सुत्फा, कक्कड, कच्चा सुर्ती, खैनी, गुटखा वा अज्याःगु हे छुं पदार्थय् म्हुतुइ तयेगु व अज्याःगु पदार्थया नसा यायेगु ज्या यायेदइमखु धाःगु दु ।

येँ महानगरपालिकाया नगरसभाया ११ औं अधिवेशनं हे सार्वजनिक थासय् धुु्रमपान निषेध यायेगु नीति पारित यानातयेधुंकूगु दु ।
महानगरपालिकां थ्व नीतियात आः कडा रुपं लागू यायेगु धाःगु खः । महानगरपालिकां थ्व नियम उल्लेघन याःपिंतं सूर्तीजन्य पदार्थ नियन्त्रण व नियमन यायेगु ऐन २०६८ या आधारय् कारवाही यायेगु खँ धाःगु दु । थ्व ऐन कथं सार्वजनिक थासय् धु्रमपान वा सूर्तीजन्य पदार्थ नःपिंत सार्वजनिक थासं पित छ्वयेगु लिसें जरिवाना पुइके फइ ।