नाला करुणामय जात्रा याइम्ह द्यः खुयायंकूपिं स्वम्ह ज्वन

ख्वप- नाला करुणामय द्यः सृष्टिकान्त लोकेश्वरया जात्रा याइम्ह द्यः खुयायंकूपिं स्वम्हेसित प्रहरीं ज्वंगु दु । थ्व द्यः म्हिगः सुथय् खुया यंकातःगु खः ।

स्थानीय मनूत पूजा यायेत वंगु इलय् खुया यंकातःगु सीकूगु खः । साढे ३ फिट तजाःम्ह थ्व द्यः फागुन महिनां नाला देय् चाःहिकाः जात्रा याइबलय् जक पित हइम्ह खः । लोकेश्वरया पुलांम्ह पुजारी हेरागुर्जु बज्राचार्यं श्रीखण्डं दयेकातःम्ह उम्ह तुयुम्ह द्यःयात गबलय् खुया यंकूगु धइगु तकं सीमदुगु खँ धयादीगु दु ।

उगु घटनाय् संलग्न जूगु आशंका यासें जिल्ला प्रहरी कार्यालय काभ्रें स्वम्ह मनूयात ज्वनातःगु दु । उमित आः अनुसन्धानया लागिं बनेपा चौकी तयातःगु खँ प्रहरीं धाःगु दु । थुम्ह द्यः थ्वयां न्ह्यः नं निक्वः तक खुयायंके धुंकूम्ह खःसां हानं हानं लुयाः वयेवं प्रतिष्ठापित यानातःम्ह खः ।

खुँतय्सं द्यःया नापनापं अन तया तःगु द्यःया आपालं बहुमूल्य तिसा नं खुया यंकूगु खः । मनूतय्त ज्वना तःसां द्यः व तिसा धाःसा लुया मवःनिगु खँ धाःगु दु ।