नागरिकता विधेयक हाकनं राष्ट्रपतियाथाय्, आः राष्ट्रपतिं छु याइ ?

येँ (नेपालभाषा टाइम्स)- विवादास्पद नागरिकता विधेयक प्रमाणिकरणया निंतिं हाकनं राष्ट्रपतियाथाय् थ्यंगु दु । प्रतिनिधि सभा व राष्ट्रिय सभां राष्ट्रपतिं न्हापा लित छ्वयाहःगु विधेयक गथे खः अथे हे पारित यायेवं सोमवाः प्रमाणिकरणया निंतिं शितल निवास छ्वःगु खः ।

नागरिकता विधेयक हाकनं राष्ट्रपतियाथाय् थ्यनेवं आः राष्ट्रपतिं छु याइ धयागु कौतुहलता सुरु जूगु दु । राष्ट्रपति विद्या भण्डारीं न्हापांखुसी प्रमाणिकरणया निंतिं वःबलय् थीथी १५ बुँदाया सन्देश सहित प्रतिनिधि सभाय् हे लितछ्वःगु खः । तर प्रतिनिधि सभा व राष्ट्रिय सभां राष्ट्रपतिया सन्देशयात बेवास्ता यानाः न्हापा गथे खः अथे हे विधेयक पारित यानाः हाकनं प्रमाणिकरणया निंतिं छ्वया हयेवं राष्ट्रपति भण्डारीयात विधेयकय् छु यायेगु धयागु दबाब लाःगु दु ।

संविधान कथं निगुलिं सदन ंपारित यानाः निक्वःखुसी छ्वयाहःगु विधेयकयात राष्ट्रपतिं हाकनं लित छ्वयेफइमखु । उगु विधेयकयात राष्ट्रपतिं झिंन्यान्हुया दुने प्रमाणिकरण यायेमाः । तर राष्ट्रपति भण्डारी आः सदनं पारित जुयावःगु नागरिकता ऐन लागू यायेमजिउ धयागु पक्षय् दु । सदनय् हाकनं गथे खः अथे हे नागरिकता विधेयक पारित जुया वइगु सम्भावना दुगुलिं छुं न्हि न्ह्यव वय्कलं थःम्हं राजीनामा बीगु संकेत तकं क्यनादीगु खः । थ्व झ्वलय् वय्कलं थीथी व्यक्तिपिं लिसे परामर्श यायेगु तकं सुरु यानादीधुंकूगु खः । आः वय्कःया अनिच्छा कथं विधेयक गथे खः अथे हे प्रमाणिकरणया निंतिं वःगुलिं राष्ट्रपति भण्डारीं विधेयक प्रमाणिकरण याइ कि राजीनामा बी धयागु चर्चा सुरु जूगु दु ।

थुकिया लिसें यदि राष्ट्रपतिं विधेयक प्रमाणिकरण मयासे राजीनामा बिल धाःसा थ्व विधेयक छु जुइ धयागु न्ह्यसः नं ब्वलनाच्वंगु दु । गुलिखे संविधान–विद्तय्सं यदि राष्ट्रपतिं राजीनामा बिल धाःसा मेम्ह राष्ट्रपति मवःतले विधेयक प्रमाणिकरण जुइफइमखु धयाच्वंगु दुसा गुलिखे संविधानविद्तय्सं धाःसा राष्ट्रपतियाथाय् झिंन्यान्हु च्वनेधुंकाः यदि राष्ट्रपतिं राजीनामा बिल धाःसा उपराष्ट्रपतिं विधेयक प्रमाणिकरण याइ धयाच्वंगु दु ।

उपराष्ट्रपतिं विधेयक प्रमाणिकरण याइ धयागु खँय् धाःसा अन्यौलता दु । संविधानय् राष्ट्रपतिं विधेयक प्रमाणिकरण याइ जक धयातःगु अवस्थाय् विधेयक प्रमाणिकरणया निंतिं उपराष्ट्रपतियाथाय् वनी मखु धयागु तर्क वयाच्वंगु दु ।

सम्बन्धित बुखँ

LEAVE YOUR COMMENTS