चुनावया मत सर्वेक्षण याये मदु

येँ (नेपालभाषा टाइम्स)- मंसिर ४ गते जुइगु चुनावयात कयाः सुनां नं मत सर्वेक्षण याये मदइगु जूग दु । निर्वाचन आयोगं म्हिगः छगू प्रेस विज्ञप्ति जारी यासें निर्वाचन आचार संहिता लागू जुइधुंकूगुलिं सामाजिक सञ्जालपाखें समेत मत सर्वेक्षण याये मदइगु खँ धाःगु खः ।

उम्मेदवारया मनोनयनपत्र दर्ता जूगु न्हिनिसें मतदान क्वमचाःतले उम्मेदवार वा राजनीतिक दलया मत परिणामबारे छुं नं कथंया मत सर्वेक्षण यायेगु वा सर्वेक्षणया लिच्वः पिकाये मदइगु खँ विज्ञप्तिइ धयातःगु दु ।

लिसें आचार संहिताया दफा ४ या (थ) कथं निर्वाचनयात लिच्वः लाइगु वा पंगः वइकथंया छुं बिचाः तयेगु, प्रचार प्रसार यायेगु, विद्युतीय सामग्री उत्पादन यायेगु व सामाजिक सञ्जालय् मेपिसं पिकाःगु सामग्री शेयर याये मदइगु खँ नं धाःगु दु ।

आचार संहिता उल्लंघन यानाः यदि सुनां नं अज्याःगु ज्या यात धाःसा कानुन कथं कारबाही जुइगु खँ नं आयोगं धाःगु दु । थज्याःगु ज्या याइपिंत कानुन कथं छगू लाख तका तक जरिवाना व कैद सजाय जुइ फइगु खँ धाःगु दु ।

आचार संहिता अःखः गुलिखे मनूतय्सं सामाजिक सञ्जाल मार्फत राजनीतिक दल व उम्मेदवारया सम्बन्धय् मत सर्वेक्षण याःगु लिसें उकिया लिच्वः सार्वजनिक याःगु खँ नं निर्वाचन आयोगं यानाच्वंगु अनुगमनया झ्वलय् लुयाच्वंगु खँ धाःगु दु ।