ज्ञानमालाया ख्वप क्षेत्रीय उपसमिति गठन
ख्वप – नेपाल राष्ट्रिय ज्ञानमाला समितिया ख्वप जिल्ला क्षेत्रीय उपसमिति नीस्वंगु दु । समितिया ग्वसालय् दिपंकर ज्ञानमाला भजन खलः क्वाठण्डौंया व्यवस्थापनय् बौद्ध समकृत विहार कुथुबही जूगु ज्याझ्वलय् ख्वप क्षेत्रीय उपसमिति नीस्वंगु खः ।
दिपंकर ज्ञानमाला भजन खलःया लिउनायः पुण्यत्न शाक्यया सभापतित्वय् समितिया सल्लाहकार बौद्ध विद्वान प्रा. सुवर्ण शाक्यया प्रमुख आतिथ्यताय् जूगु ख्वप क्षेत्रीय उपसमिति गठन ज्याझ्वलय् छ्यांजे पुष्परत्न शाक्यं लसकुस यानादीगु खः ।
समितिया केन्द्रीय नायः रमना श्रेष्ठं ज्ञानमाला भजनया स्तरीयता अप्वयेका यंकेत सः, लय् व रचना नं बांलाका यंके फत धाःसा ज्ञानमाला भजनया प्रस्तुति नं स्तरीय जुइगु विचाः प्वंकादिल । मूपाहां प्रा. शाक्यं क्षेत्रीय उपसमितिया गठन लिपा आः संगठन क्वातुया वनीगु नापं बुद्ध धर्मया प्रचार प्रसारय् नं तिबः जुइगु विश्वास प्वंकादिल ।
समितिया मूछ्यांजे इन्द्रमुनी शाक्यं क्षेत्रीय उपसमितिया उद्देश्य व नीति नियम न्ह्यब्वयादीगु ज्याझ्वलय् प्रक्रियाकथं क्षेत्रीय उपसमितिइ मनोनित जुयादीपिं पदाधिकारीया नां सार्वजनिक याःगु खः ।
ख्वप क्षेत्रीय उपसमितिया संयोजकय् पुण्यरत्न शाक्य, सह संयोजकय् गणेशराम प्रजापति, गौतम वज्राचार्य छ्यांजे, तुल्सीकाजी मानन्धर दांभरिंलय् च्वनादीगु दुसा दुजलय् विकुराम बोहजु, बुद्धरत्न वज्राचार्य, चनेलाल मानन्धर, पुण्यरत्न वज्राचार्य, कृष्णभक्त हाँयजु, मैयादेवी मानन्धर व देवबहादुर वज्राचार्य च्वनादीगु दु ।
LEAVE YOUR COMMENTS