महानगरपालिकाय् खाद्य निरीक्षक

येँ(नेपालभाषा टाइम्स)- येँ महानगरपालिकां खाद्य पदार्थया नियमन व अनुगमनया निंतिं खाद्य निरीक्षक (फुड इन्सपेक्टर) तइगु जूगु दु । येँ महानगरया आइतवाः च्वंगु कार्यपालिकाया बैठकं उगु निर्णय याःगु खः ।

महानगर प्रमुख बालेन्द्र शाहं आइतवाः च्वंगु कार्यपालिकाया बैठकय् प्यम्हनिसें न्याम्ह तक खाद्य निरीक्षक तयेगु प्रस्ताव यानादीगु खः । बैठकं फुट टेक्नोलोजीइ स्नातकोत्तर याःपिं प्यम्हनिसें न्याम्ह खाद्य निरीक्षक तयेगु निर्णय याःगु खः । थुपिं खाद्य निरीक्षकं ला, खाद्य पदार्थ, किराना लगायतया पसःया निरीक्षण व अनुगमन याइगु खँ धाःगु दु ।

थुकथं हे येँ महानगरपालिकां महानगर दुनेया सरकारी ब्वनेकुथिया ब्वँमिपिंत खाजा खर्च उपलब्ध याकीगु जूगु दु । महानगरपालिकां थःगु कार्यक्षेत्र दुनेया दक्वं सरकारी ब्वनेकुथिया तगिं च्यागू तकया ब्वँमिपिनिगु निंतिं न्हिं २५ तका दरं खाजा खर्च उपलब्ध याकेत्यंगु खः ।

नेपाल सरकारं ६ गू तगिं तकया ब्वँमिपिंत खाजा वापत १५ तका बिया वयाच्वंगु खःसा उकी महानगरं १० थप यायेगु प्रस्ताव कार्यपालिकाया बैठकय् याःगु खः । कार्यपलिकाया बैठकं ७ व ८ गू तगिंया ब्वँमिपिंत नं खाजा खर्च उपलब्ध याकेगु प्रस्ताव याःगु खःसा उकिया निंतिं महानगरपालिकां ९ गू करोड बजेट नं विनियोजन यायेधुंकूगु दु ।

महानगरं विद्यार्थीतय् उपस्थिति अर्थात हाजिरी स्वयाः खाजा खर्च उपलब्ध याकेगु महानगरपालिका शिक्षा विभागं जानकारी बिउगु दु । बैठकं न्याम्ह कानूनी सल्लाहकार नं नियुक्त याःगु दु ।

सम्बन्धित बुखँ

LEAVE YOUR COMMENTS