मेलम्ची वल, तर लः मगाःनि

येँ (नेपालभाषा टाइम्स)÷वंगु ४० दँ न्ह्यवंनिसें स्वनिगःया जनतां ‘थौं वइ ला कन्हय् वइ ला’ धकाः पियाच्वंगु मेलम्चीया लः म्हिगःनिसें औपचारिक रुपं येँय् इनेगु शुरु जुल । राष्ट्रपति विद्यादेवी भण्डारीं थनया भृकुटीमण्डपय् छगू ज्याझ्वःया दथुइ ‘लः वितरण’ उलेज्या यानादीगु खः ।

मेलम्चीया लः वयेवं स्वनिगलय् लःया अभाव जुइ मखु धायेगु यानातःसां थुलि लखं येँय् लःया अभाव म्हो जुइगु सम्भावना धाःसा खने मदुगु खँ धया हःगु दु ।

थौंकन्हय् येँय् न्हिं ४५ करोड लिटर लःया माग दु । तर काठमाडौं उपत्यका खानेपानी लिमिटेड (केयुकेएलं) न्हिं १२ करोड लिटर ति जक लः बी फयाच्वंगु दु । आः मेलम्ची नं वःगुलिं स्वनिगःया लः आपूर्तिइ न्हिं १७ करोड लिटर लः थपे जूगु दु । अथे धइगु आः केयुकेएलं न्हिं २९ करोड लिटर ति लः बी फइ । अर्थात लःया आपूर्ति आः नं प्रयाप्त जुइ मखुनि ।

आः वःगु लः मेलम्चीया न्हापांगु चरणपाखें वःगु खः । मेलम्चीया निगूगु चरणय् आः याङ्ग्री खुसिपाखें १७ करोड लिटर व लार्के खुसिपाखें हानं मेगु १७ करोड लिटर लः हयेगु ग्वसाः जुयाच्वंगु दु । याङ्ग्री व लार्के खुसिइ मेगु ९ किलोमिटर व २ किलोमिटरया निगू सुरुंग दयेकाः अनया लः मेलम्ची खुसिइ ल्वाकछ्यायेगु व उगु लःयात आःयागु सुरुंग मार्फत हानं येँय् हयेगु ज्या जुइत्यंगु दु । थुकथं मेलम्ची, याङ्ग्री व लार्के यानाः स्वंगू खुसिया लः हयेव तिनि येँय् न्हिं करिब ६० करोड लिटर लः आपूर्ति याये फइ । सन् २०३२ य् येँय् लःया माग न्हिं ६० करोड लिटर थ्यनीगु अनुमान जुयाच्वंगु दु ।

याङ्ग्री व लार्केय् नं सुरुंग म्हुइगु शुरु जुइधुंकूसां गबलय् सिधइ धाये मफुनि । अथे नं म्हिगः उलेज्याय् न्ववासें प्रधानमन्त्री केपी ओलीं मेगु स्वदँया दुने लार्के व याङ्ग्रीया लः नं हयेगु बचं बियादीगु दु । पुलांगु योजना कथं थौंकन्हय् येँय् मेलम्ची मखु याङ्ग्री व लार्केया समेत लः वयेमाःगु खः । तर बल्ल तल्ल मेलम्चीया लः तिनि वःगु कारणं मेगु निगू खुसिया लः गबलय् वइ धाये मफुगु खँ धयाच्वंगु दु ।