ने. सं. ११४६ बछलाथ्व तृतीया - अक्षय तृतीया, भिक्षु प्रज्ञानन्द महास्थविरया १२६ क्वःगु बुदिं

गौतमश्री सहकारीया निक्षेपकर्तातय् नं थःथःगु गुट !

येँ (नेपालभाषा टाइम्स)- येँय् आपालं सहकारीत बिसिउँ वनेधुंकल, तर नकतिनि बिसिउँ वन धाःगु गौतमश्री सहकारीया बारे धाःसा यक्व हे चर्चा जुयाच्वंगु दु । कारण, थन येँया आपालं स्थानीयवासीया ध्यबा लानाच्वंगु दु । सहकारी बन्द जुइधुंकाः बिसिउँ वनाच्वंम्ह अनया प्रमुख रामबहादुर गौतम हानं लिहां वयाः ध्यबा लित बीगु खँ धायेधुंकूगु दु । आः ध्यबा लित वइगु धायेवं अनं ध्यबा लिकायेगु लागिं धाःसा अजू अजूचायापुगु ज्याखँत जुयाच्वंगु सीदुगु दु ।

थ्व सहकारीइ करिब ११०० म्ह मनूया १७ अर्ब स्वयां अप्वः दां फसे जुयाच्वंगु खँ धाःगु दु । अन छगू करोड स्वयां अप्वः ध्यबा तयातःपिं मनूत हे ग्वाःग्वाः दु । छुं जुयाः थ्व सहकारीया ध्यबा लित बीगु लागिं सहकारी विभागं हस्तक्षेप यात धाःसा अन करोडौं तका दां तयातःपिं मनूतय्के उगु ध्यबाया स्रोत छु खः धकाः केरकार याइगु नं सम्भावना दु ।

स्रोत क्यनेम्वाःगु जूगुलिं अप्वः धइथें ततःधंगु सहकारीइ ‘ब्ल्याक मनी’ नं तया तइगु खँ विज्ञतय्सं धाःगु दु । उकिं गौतमश्री सहकारीइ नं करोडौं ध्यबा तयातःपिं मनूतय्गु स्रोत मालेगु शुरु यात धाःसा थःपिं हानं मेगु काण्डय् फसे जुइ धकाः थौंकन्हय् अन करोड स्वयां अप्वः ध्यबा तयातःपिं निक्षेपकर्तात जक छथाय् मुनाः बिस्कं पुचः दयेकूगु खँ सीदुगु दु । थुमि दथुइ थौंकन्हय् स्रोत क्यनेगुपाखें बचे जुइगु व सहकारीया गुगु अचल सम्पत्ति ल्हातय् लाकेगु धकाः सहलह जुयाच्वंगु खँ सूत्रं धाःगु दु ।

करोड तयातःपिंसं पुचः दयेकेवं दैनिक ध्यबा तइपिं चीधंपिं निक्षेपकर्तातय्सं नं थःगु बिस्कं पुचः दयेकूगु दु । थुकी अप्वः यानाः छगू लाख स्वयां कम ध्यबा दुपिं निक्षेपकर्तात दुथ्याः ।

करोड व हजारवाला निक्षेपकर्तातय्सं थःथःगु पुचः दयेकेवं आः छगू लाख स्वयां अप्वः ध्यबा तयातःपिं लाखवाला निक्षेपकर्तातय्सं नं अलग्ग पुचः दयेकेगु तयारी यानाच्वंगु खँ सीदुगु दु ।

अथे हे आः माल धाःसा ख्यानाः जूसां ध्यबा उठे याये फुपिं डन थेंज्याःपिं मनूतय्सं नं मेगु बिस्कं पुचः दयेकाच्वंगु खँ नं सूत्रं धाःगु दु ।
सूत्रया कथं थ्व सहकारीइ विशेष यानाः माओवादी कार्यकर्तातय्गु स्रोत क्यने मछिंगु ध्यबा अप्वः लानाच्वंगु दु । चुनावया न्ह्यःने माओवादीं उगु ध्यबा लिकायेवं सहकारीयात आर्थिक समस्या शुरु जूगु खँ धाःगु दु । आः थीथी थासय् सहकारीं न्यानाः वांछ्वया तःगु जग्गा व छेँया मूल्यांकन यानाच्वंगु खँ सीदुगु दु ।