चिकंया भाः अझं कुहां वइ मखु

येँ (नेपालभाषा टाइम्स)- नेपाल आयल निगमं पेट्रोलियम पदार्थया भाः क्वःमकायेगु खँ धाःगु दु । निगमं छगू प्रेस विज्ञप्ति जारी यासें निगमं झिंन्यान्हुया दुने १८ करोड लबः काःगु खःसां न्हापाया त्यासा पुलेमाःगुलिं पेट्रोलियम पदार्थया भाः कुहां मवइगु खँ धाःगु खः ।

निगमं म्हिगः जारी याःगु विज्ञप्तिइ धयातःगु दु, ‘१ अक्टोबरय् वःगु न्हूगु भाः कथं निगमयात १८ करोड तका लबः खनेदु, तर भारतीय आयल कर्पोरेशनयात पुलेमाःगु बक्यौता व सरकारी त्यासाया कारणं तत्काल उपभोक्ता भाः क्वकाये मफइगु बाध्यात्मक अवस्थाय् निगम थ्यंगु दु ।’

सरकार व भारतीय आयल निमगया पुलेमाःगु त्यासा २९ अर्ब १३ करोड दुगुलिं निगमं तत्काल भाः क्वकयाः समायोजन याये मफइगु खँ धाःगु दु । उकथं हे निगमं भारतीय आयल कर्पोरेशन असोज ३० गते छ्वयाहःगु भाःया कारणं निगमयात लबः दुगु खःसां नं कार्तिक १६ गते छ्वयाहःगु न्हूगु भाः छुं भचा थहां वंगु खँ नं धाःगु दु ।